వైయస్ జగన్ కు చెక్: రోశయ్య ఔట్, కిరణ్ కుమార్ రెడ్డి ఇన్

న్యూఢిల్లీ: ముఖ్యమంత్రిగా కె. రోశయ్యను తొలగించే అవకాశాలున్నట్లు తెలుగు టీవీ చానెళ్లలో వార్తాకథనాలు ప్రసారమవుతున్నాయి. మంగళవారం ఢిల్లీలో రోశయ్య తన రాజీనామా లేఖను కాంగ్రెసు అధ్యక్షురాలు సోనియా గాంధీకి సమర్పించినట్లు కూడా పుకార్లు షికార్లు చేస్తున్నాయి. బుధవారం సాయంత్రం జరిగే సిఎల్పీ సమావేశానికి కాంగ్రెసు ఆంధ్రప్రదేశ్ వ్యవహారాల ఇంచార్జీ వీరప్ప మొయిలీ మాత్రమే కాకుండా ప్రణబ్ ముఖర్జీ, అహ్మద్ పటేల్ కూడా వస్తున్నట్లు సమాచారం. దీన్నిబట్టి కూడా సిఎల్పీ సమావేశంలో కీలక నిర్ణయాలు తీసుకునే అవకాశాలున్నట్లు చెబుతున్నారు. రోశయ్యను మార్చడానికే అధిష్టానం నిర్ణయం తీసుకున్నట్లు ఊహాగానాలు చెలరేగుతున్నాయి. కడప పార్లమెంటు సభ్యుడు వైయస్ జగన్ కు చెక్ పెట్టే బలమైన సామాజికవర్గానికి చెందిన నాయకుడి ముఖ్యమంత్రి పీఠంపై కూర్చోబెట్టాలనే ఉద్దేశంతో సోనియా గాంధీ ఉన్నట్లు చెబుతున్నారు.

ప్రస్తుత స్పీకర్ కిరణ్ కుమార్ రెడ్డిని ముఖ్యమంత్రి పీఠం అప్పగించే అవకాశాలున్నట్లు వార్తలు వస్తున్నాయి. ముఖ్యమంత్రి రేసులో తెలంగాణకు చెందిన గీతారెడ్డితో పాటు ఆంధ్ర ప్రాంతానికి చెందిన బొత్స సత్యనారాయణ ఉన్నట్లు ప్రచారం జరుగుతోంది. రోశయ్య ఆరోగ్యం సహకరించకపోవడం, వైయస్ జగన్ వర్గాన్ని దీటుగా ఎదుర్కోలేకపోవడం వంటి కారణాల వల్ల ముఖ్యమంత్రిని మార్చాలని నిర్ణయం తీసుకున్నట్లు ఓ తెలుగు ప్రైవేట్ టీవీ చానెల్ వ్యాఖ్యానించింది. మంత్రులు, పార్టీ సీనియర్ నాయకులు హైదరాబాదులో ముఖ్యమంత్రి కె. రోశయ్యతో సమావేశమయ్యారు. అలాగే, తెలంగాణకు చెందిన కాంగ్రెసు శాసనసభ్యులు, ఎమ్మెల్సీలు సిఎల్పీ సమావేశంలో అనుసరించే వ్యూహంపై చర్చించేందుకు హైదరాబాదులో సమావేశమయ్యారు.

అహ్మద్ పటేల్ సిఎల్పీ సమావేశంలో ఉన్నారంటే సోనియా గాంధీ ఉన్నట్లే. వ్యవహారాలను మాత్రం ప్రణబ్ ముఖర్జీతో నడిపిస్తారు. వీరప్ప మొయిలీపై పూర్తి విశ్వాసం లేకపోవడం వల్ల కూడా వారిద్దరిని పంపిస్తున్నట్లు అర్థం చేసుకోవచ్చు. అయితే, అహ్మద్ పటేల్, ప్రణబ్ ముఖర్జీ ఉంటే వైయస్ జగన్ వర్గం పెద్ద యెత్తున గొడవ చేయడానికి వెనకాడతారని కూడా కావచ్చు.