గాలి జనార్దన్ రెడ్డితో కలిసి వైయస్ జగన్ రోశయ్యపై కుట్ర?

న్యూఢిల్లీ: కర్ణాటక మంత్రి, బిజెపి నాయకుడు గాలి జనార్దన్ రెడ్డితో కలిసి కాంగ్రెసు కడప పార్లమెంటు సభ్యుడు వైయస్ జగన్ ముఖ్యమంత్రి కె. రోశయ్య ప్రభుత్వాన్ని కూల్చడానికి ప్రయత్నిస్తున్నారనే మాట వినిపిస్తోంది. జెడియు నేత, కర్ణాటక మాజీ ముఖ్యమంత్రి హెచ్ డి కుమారస్వామి ఆ ఆరోపణ చేశారు. ఢిల్లీలో మంగళవారం కర్ణాటక, ఆంధ్రప్రదేశ్ కు చెందిన ముఖ్య నేతలంతా హడావిడి చేశారు. దీంతో ఢిల్లీ ఈ రెండు రాష్ట్రాల రాజకీయాలకు కేంద్రంగా మారింది. తెలుగుదేశం పార్టీ అధ్యక్షుడు నారా చంద్రబాబు నాయుడు, ఆంధ్రప్రదేశ్ ముఖ్యమంత్రి కె. రోశయ్య, ప్రజారాజ్యం పార్టీ అధ్యక్షుడు చిరంజీవి, కర్ణాటక మాజీ ముఖ్యమంత్రి కుమారస్వామి, ముఖ్యమంత్రి యడ్యూరప్ప మంగళవారం ఢిల్లీకి వచ్చారు. చంద్రబాబుతో కలిసి కుమారస్వామి మీడియా ప్రతినిధుల సమావేశం ఏర్పాటు చేసి గాలి జనార్దన్ రెడ్డిపై, వైయస్ జగన్ పై తీవ్ర విమర్శలు చేశారు.

గాలి జనార్దన్ రెడ్డి, వైయస్ జగన్ కలిసి ఆంధ్రప్రదేశ్ కు చెందిన శాసనసభ్యులతో మాట్లాడారని కుమారస్వామి చెప్పారు. గాలి జనార్దన్ రెడ్డి ప్రతి అక్రమ వ్యాపారంలో వైయస్ జగన్ కు పాత్ర ఉందని ఆయన ఆరోపించారు. గాలి జనార్దన్ రెడ్డి, వైయస్సార్ కుటుంబ సభ్యులు వ్యాపార భాగస్వాములని, అందువల్ల రోశయ్య ప్రభుత్వాన్ని కూల్చడానికి వారిద్దరు కలిసి కుట్ర చేస్తున్నారని ఆయన అన్నారు. మైనింగ్ కుంభకోణంలో గాలి జనార్దన్ రెడ్డి పాత్రతో పాటు వైయస్ జగన్ పాత్ర ఉందని, తాను, కుమారస్వామి కలిసి ఆ కుంభకోణానికి వ్యతిరేకంగా పోరాటం చేస్తామని చంద్రబాబు చెప్పారు. తమతో కలిసి రావాలని వారిద్దరు పరోక్షంగా చిరంజీవికి విజ్ఞప్తి చేశారు.