ఇప్పటికి యెడ్యూరప్పే: కొనసాగించేందుకు అధిష్టానం నిర్ణయం

న్యూఢిల్లీ: కర్ణాటక రాజకీయానికి తాత్కాలిక తెరపడింది. ప్రస్తుతానికి కర్ణాటక ముఖ్యమంత్రిగా బిఎస్ యెడ్యూరప్పనే కొనసాగించాలని భారతీయ జనతా పార్టీ అధిష్టానం బుధవారం నిర్ణయం తీసుకుంది. ఈ మేరకు ప్రకటన కూడా చేసింది. యెడ్యూరప్పనే ప్రస్తుతానికి ముఖ్యమంత్రిగా కొనగాసాగుతారని చెప్పింది. స్థానిక సంస్థలు వస్తున్న నేపథ్యంలో అందరూ కలిసి పని చేయాలని అధిష్టానం సూచించింది. అయితే స్థానిక సంస్థలు వస్తున్న నేపథ్యంలోనే అధిష్టానం ఈ నిర్ణయం తీసుకున్నట్లు సమాచారం. కాగా యెడ్యూరప్ప భూవివాదం పై విచారణ కమిటీ వేయాలని అధిష్టానం కర్ణాటక ప్రభుత్వాన్ని ఆదేశించింది.

కాగా యెడ్యూరప్ప న్యూఢిల్లీ వెళ్లేముందు సత్యసాయి బాబా పుట్టిన రోజు సందర్భంగా ఆయనను దర్శించుకొని వెళ్లారు. బాబా యెడ్యూరప్పను నీకు ఏ ఆటంకం కలుగదన్నట్లు ఆశీస్సులు అందించారు. ఆ తర్వాతే యెడ్యూరప్ప ఢిల్లీ వెళ్లారు. దీంతో బాబా దీవెనలు ఫలించాయని పలువురు వ్యాఖ్యానిస్తున్నారు. అంతకుముందు రెండురోజుల ముందునుండి అధిష్టానం రమ్మన్నా వెళ్లని యెడ్యూరప్ప బాబా అశీస్సులు అందుకొని వెళ్లారు.