మంత్రి పదవుల కోసం కిరణ్ కుమార్ తో చిరంజీవి బేరసారాలు

హైదరాబాద్: ముఖ్యమంత్రి కిరణ్ కుమార్ రెడ్డి ప్రభుత్వంలో చేరేందుకు ప్రజారాజ్యం పార్టీ అధినేత చిరంజీవి దాదాపు నిర్ణయం తీసుకున్నట్లు సమాచారం. అయితే, మంత్రి పదవుల కోసమే బేరసారాలు సాగుతున్నట్లు చెబుతున్నారు. పార్టీ అధిష్టానం సూచన మేరకు ముఖ్యమంత్రి ఎన్. కిరణ్ కుమార్ రెడ్డి ప్రజారాజ్యం పార్టీ నేతలతో చర్చలు జరిపినట్లు సమాచారం. తమకు ఆరు మంత్రి పదవులు కావాలని చిరంజీవి పట్టుబడుతున్నట్లు తెలుస్తోంది. అయితే, నాలుగు పదవులు ఇచ్చేందుకు కిరణ్ కుమార్ రెడ్డి సుముఖత వ్యక్తం చేశారని అంటున్నారు. మంత్రి పదవుల విషయంలో బేరసారాలు కుదిరితే ప్రజారాజ్యం పార్టీ మంత్రివర్గంలో చేరడం ఖాయమవుతుంది. సోమవారం కిరణ్ కుమార్ రెడ్డి తన మంత్రి వర్గాన్ని ఏర్పాటు చేసుకున్నారు. అందుకు గాను ఆయన శనివారం ఉదయం ఢిల్లీ వెళ్లారు. అధిష్టానంతో చిరంజీవి విషయం కూడా ఆయన మాట్లాడనున్నట్లు తెలుస్తోంది. అయితే, సోమవారం ప్రజారాజ్యం పార్టీ శాసనసభ్యులు కూడా మంత్రులుగా ప్రమాణ స్వీకారం చేస్తారా, లేదా అనేది తెలియడం లేదు.

ముఖ్యమంత్రిగా రోశయ్య ఉన్నప్పుడు తొలుత గ్రేటర్‌ హైదరాబాద్‌ ఎన్నికల్లో అవగాహనతో పోటీ చేసేందుకు కాంగ్రెసు, ప్రజారాజ్యం నుంచీ గట్టి ప్రయత్నాలే జరిగాయి. ఒక దశలో పొత్తు కుదిరినట్లేనని భావించినా కాంగ్రెస్‌ గ్రూపు రాజకీయాలతో అది ఆచరణలోకి రాలేదు. తరువాత ప్రరాపా ప్రభుత్వంలో చేరుతుందనే ప్రచారం బలంగా వినిపించింది. తనవర్గం ఎమ్మెల్యేలతో జగన్‌ పార్టీని వీడినా, సహాయ నిరాకరణ చేసినా ప్రభుత్వానికి ఇబ్బంది లేకుండా ప్రరాపా ఎమ్మెల్యేల్ని మంత్రివర్గంలోకి తీసుకుంటుందని భావించారు. అధికార పార్టీ ఎమ్మెల్యేలతో సమానంగా వీరి నియోజకవర్గాల పనులు చూడమనే సందేశం కాంగ్రెస్‌ అధిష్ఠానం నుంచి వచ్చిందని సమాచారం.