ఎడతెగని చిరంజీవి చర్చలు: క్యాబినెట్ లో చేరికపై మల్లగుల్లాలు

హైదరాబాద్: ముఖ్యమంత్రి కిరణఅ కుమార్ రెడ్డి మంత్రివర్గంలో చేరే విషయంపై ప్రజారాజ్యం పార్టీ అధినేత చిరంజీవి తన పార్టీ నాయకులతో, శాసనసభ్యులతో ఎడతెగని చర్చలు జరుపుతున్నారు. సమావేశాల్లో వివిధ అభిప్రాయాలు వ్యక్తమవుతున్నాయి. ప్రభుత్వంలో చేరే విషయంపై మల్లగుల్లాలు పడుతున్నారు. తాజా పరిణామాల నేపథ్యంలో కొత్త వాదన కూడా ముందుకు వస్తోంది. ప్రభుత్వంలో చేరే విషయంపై ప్రజారాజ్యం పార్టీ పునరాలోచన చేస్తున్నట్లు సమాచారం. ప్రభుత్వానికి ప్రస్తుతం బయటి నుంచి మద్దతు ఇవ్వాలని కూడా అనుకుంటున్నట్లు తెలుస్తోంది. తాజా పరిణామాలను జాగ్రత్తగా పరిశీలించిన తర్వాతనే ప్రభుత్వంలో చేరాలనే ఆలోచన చేస్తున్నట్లు కూడా వార్తలు వస్తున్నాయి.

ప్రభుత్వంలో చేరితే శాసనసభ్యుల నుంచి ఎదురయ్యే ఒత్తిళ్ల గురించి కూడా చిరంజీవి ఆలోచిస్తున్నట్లు తెలుస్తోంది. వంగా గీత ఇప్పటికే చిరంజీవిని హెచ్చరించినట్లు సమాచారం. తనకు మంత్రి పదవి ఇస్తేనే పార్టీలో ఉంటానని చెప్పినట్లు ప్రచారం జరిగింది. అయితే, ఆ వార్తలను వంగా గీత ఆ వార్తలను ఖండించారు. కాగా, శాసనసభ్యురాలు శోభా నాగిరెడ్డి భర్త, ప్రజారాజ్యం నాయకుడు భూమా నాగిరెడ్డి వైయస్ జగన్ ను కలిసి మంతనాలు జరిపారు. శోభానాగిరెడ్డి, భూమా నాగిరెడ్డి దంపతులు మొదటి నుంచి వైయస్ జగన్ కు అనుకూలంగా వ్యవహరిస్తున్నారు. ఈ స్థితిలో చిరంజీవి సాయంత్రం ఐదు గంటలకు శాసనసభా పక్ష సమావేశాన్ని ఏర్పాటు చేశారు.