వైయస్ జగన్ పై కాంగ్రెసులో కొంత మంది కుట్ర చేశారు: రోజా

హైదరాబాద్: వైయస్ జగన్ పై కాంగ్రెసులోని కొంత మంది నాయకులు కుట్ర చేశారని సినీ నటి, రాజకీయ నాయకురాలు రోజా విమర్శించారు. వైయస్ కుటుంబ సభ్యులను మనస్తాపానికి గురి చేసి వైయస్ జగన్, విజయలక్ష్మి రాజీనామాలు చేసే విధంగా కుట్ర చేశారని ఆమె సోమవారం ఆరోపించారు. వైయస్ జగన్ రాజీనామా కాంగ్రెసు పార్టీకి తీవ్ర నష్టం కలిగిస్తుందని, కాంగ్రెసుకు పెద్ద దెబ్బ అని ఆమె అన్నారు.

వైయస్ రాజశేఖర రెడ్డి 30 ఏళ్ల పాటు తీవ్ర ఇబ్బందులకు గురయ్యారని, కాంగ్రెసును గెలిపించాలనే తపనతో వైయస్సార్ పాదయాత్ర చేశారని, రాష్ట్రంలోనే కాదు కేంద్రంలోనూ కాంగ్రెసు పార్టీ ప్రభుత్వం ఏర్పడడానికి వైయస్సార్ కృషే కారణమని, అటువంటి వైయస్సార్ కుటుంబ సభ్యులను మనస్తాపానికి గురి చేశారని ఆమె అన్నారు.