వైయస్ జగన్, విజయలక్ష్మి పదవులకు, పార్టీకి రాజీనామా

హైదరాబాద్: లోకసభ సభ్యత్వానికి వైయస్ జగన్ రాజీనామా చేశారు. వైయస్సార్ సతీమణి విజయలక్ష్మి తన శాసనసభ సభ్వత్వానికి రాజీనామా చేశారు. వారిద్దరు కాంగ్రెసు పార్టీకి కూడా రాజీనామా చేశారు. పార్టీ అధిష్టానం కుతంత్రాలకు మనోవేదనతో రాజీనామా చేస్తున్నట్లు వైయస్ జగన్ ప్రకటించారు. ఈ మేరకు ఆయన ఐదు పేజీల బహిరంగ లేఖ రాశారు. కాంగ్రెసు పార్టీ అధిష్టానం చర్యలపై తీవ్ర ఆగ్రహం వ్యక్తం చేస్తూ వైయస్ జగన్ రాజీనామా చేశారు. తన బాబాయ్ వైయస్ వివేకానంద రెడ్డిని మంత్రివర్గంలోకి తీసుకుని వైయస్సార్ కుటుంబాన్ని చీల్చడానికి అధిష్టానం పూనుకుందని అభిప్రాయపడిన ఆయన రాజీనామాస్త్రం ప్రయోగించారు. తకన వర్గం శాసనసభ్యులు, సన్నిహితులు చెప్పినా వినకుండా వైయస్ జగన్ రాజీనామా చేశారు. బుధవారం వరకు ఆగాలని చెప్పినా ఆయన వినలేదు.

రాజీనామా చేయడానికే విజయలక్ష్మి హైదరాబాదు వచ్చినట్లు భావిస్తున్నారు. తాను రాజీనామా చేయడానికి దారి తీసిన పరిస్థితులపై జగన్ ఆ బహిరంగ లేఖ రాశారు. తమ కుటుంబంలో చిచ్చు పెట్టినందుకు కలత చెంది వారిద్దరు రాజీనామాస్త్రాలు సంధించారు. సొంత పార్టీ పెట్టేందుకే వైయస్ జగన్ నిర్ణయించుకున్నట్లు తెలుస్తోంది. తనకు చెక్ పెట్టేందుకే చిరంజీవిని మంత్రివర్గంలో చేర్చుకుంటున్నారని కూడా ఆయన భావిస్తున్నారు. తనను ఈ రకంగా ఒంటరి చేయడానికి, తనను వేధించడానికి పూనుకుందని వైయస్ జగన్ మనస్తాపానికి గురైనట్లు భావిస్తున్నారు.