39 మందితో ముఖ్యమంత్రి కిరణ్ కుమార్ రెడ్డి టీమ్ ఇదే

హైదరాబాద్‌: ముఖ్యమంత్రి కిరణ్‌కుమార్‌రెడ్డి 39మంది మంత్రుల జాబితాను బుధవారం ఉదయం గవర్నర్‌కు పంపారు. సీఎం కార్యాలయ కార్యదర్శి జవహర్‌రెడ్డి మంత్రుల జాబితాను గవర్నర్‌కు అందజేశారు. కాబోయే మంత్రులకు కిరణ్‌కుమార్‌రెడ్డి స్వయంగా ఫోన్‌చేసి చెప్పారు. అందరి అంచనాలను తలకిందులు చేస్తూ కిరణ్ కుమార్ రెడ్డి మంత్రివర్గ కూర్పు జరిగింది. తన మంత్రి వర్గ కూర్పు విషయంలో ఆయన అత్యంత గోప్యంగా ఉంచారు. ఆయన పూర్తి స్థాయి మంత్రివర్గాన్ని ఏర్పాటు చేసుకుంటున్నారు. జగన్ వర్గీయులుగా ముద్ర పడిన బాలినేని శ్రీనివాస రెడ్డి, పిల్లి సుభాష్ చంద్రబోస్, శిల్పా మోహన్ రెడ్డిలతో పాటు గాదె వెంకటరెడ్డి, పెద్దిరెడ్డి రామచంద్రారెడ్డిలకు మంత్రివర్గంలో చోటు లభించలేదు. అనూహ్యంగా జెసి దివాకర్ రెడ్డిని కూడా పక్కన పెట్టారు. రఘువీరా రెడ్డికి మంత్రి పదవి ఇస్తుండడంతో జెసి దివాకర్ రెడ్డిని పక్కన పెట్టాల్సి వచ్చిందని అంటున్నారు. బుధవారం ఉదయం పది గంటల 13 నిమిషాలకు కొత్త మంత్రులు ప్రమాణ స్వీకారం చేస్తారు.

జిల్లాల వారీగా మంత్రుల వివరాలు....మెదక్‌-సునీతాలక్ష్మారెడ్డి, గీతారెడ్డి, దామోదర రాజనరసింహ, హైదరాబాద్‌-ముఖేష్‌గౌడ్‌, దానం నాగేందర్‌, శంకర్రావు, మహబూబ్‌నగర్‌- జూపల్లి కృష్ణారావు, డి.కె.అరుణ, నల్గొండ- జానారెడ్డి, కోమటిరెడ్డి వెంకటరెడ్డి, రంగారెడ్డి- సబితా ఇంద్రారెడ్డి, ఖమ్మం- రాంరెడ్డి వెంకటరెడ్డి, గుంటూరు- కన్నా లక్ష్మీనారాయణ, డొక్కా మాణిక్యవరప్రసాద్‌, మోపిదేవి వెంకటరమణ, కాసు వెంకటకృష్ణారెడ్డి, వరంగల్‌- బసవరాజు సారయ్య, పొన్నాల లక్ష్మయ్య, నిజామాబాద్‌-సుదర్శన్‌రెడ్డి, కరీంనగర్‌- డి.శ్రీధర్‌బాబు, అనంతపురం- రఘువీరారెడ్డి, శైలజానాథ్‌, నెల్లూరు-ఆనం రామనారాయణరెడ్డి, కృష్ణా- కె.పార్థసారధి, విశాఖ- పసుపులేటి బాలరాజు, ప్రకాశం- మానుగుంట మహీధర్‌రెడ్డి, పశ్చిమగోదావరి - పితాని సత్యనారాయణ, వట్టి వసంత్‌కుమార్‌, శ్రీకాకుళం- ధర్మాన ప్రసాదరావు, శత్రుచర్ల విజయరామరాజు, కడప- వై.ఎస్‌. వివేకానందరెడ్డి, డి.ఎల్‌. రవీంద్రారెడ్డి, అహ్మదుల్లా, తూర్పుగోదావరి- పి. విశ్వరూప్‌, తోటనిర్సింహ, కర్నూలు- టి.జి.వెంకటేష్‌, ఏరాసు ప్రతాప్‌రెడ్డి, చిత్తూరు - గల్లా అరుణకుమారి, విజయనగరం - బొత్స సత్యనారాయణ, క్యాబినెట్‌లో చోటు దక్కించుకున్నారు. మంత్రివర్గంలో 11 మంది కొత్తవారికి చోటు దక్కింది. 5 మంది తాజా మాజీ మంత్రులకు ఉద్వాసన పలికారు.