39 మందితో కొలువు దీరిన కిరణ్ కుమార్ రెడ్డి మంత్రివర్గం

హైదరాబాద్: ముఖ్యమంత్రి కిరణ్ కుమార్ రెడ్డి మంత్రివర్గం ప్రమాణ స్వీకారం బుధవారం ఉదయం పండితులు నిర్ణయించిన సుమూహూర్తం 10.14 నిమిషాలకు రాజ్ భవన్లో ప్రారంభమయింది. ఆంగ్ల అక్షరాల వరుస ప్రకారం ప్రమాణ స్వీకారం చేశారు. ముఖ్యమంత్రి కిరణ్ కుమార్ జిల్లాకే చెందిన గల్లా అరుణకుమారి మొదటగా ప్రమాణ స్వీకారం చేశారు. ఆ తర్వాత వరుసగా డికె అరుణ, పసుపులేటి బాలరాజు, ఆనం రామనారాయణరెడ్డి, బస్వరాజు సారయ్య, బొత్సా సత్యనారాయణ, డిఎల్ రవీంద్రారెడ్డి, దామోదర రాజనర్సింహా, దానం నాగేందర్, ధర్మాన ప్రసాదరావు, డొక్కా మాణిక్యవరప్రసాద్, ఏరాసు ప్రతాపరెడ్డి, జె. గీతారెడ్డి, జానారెడ్డి, జూపల్లి కృష్ణారావు, కన్నా లక్ష్మీనారాయణ, కాసు వెంకటకృష్ణారెడ్డి, కోమటిరెడ్డి వెంకటరెడ్డి, మహీధర్ రెడ్డి, మోపిదేవి వెంకటరమణరావు, ముఖేష్ గౌడ్, పార్థసారథి, పితాని సత్యనారాయణ, పొన్నాల లక్ష్మయ్య, రఘువీరారెడ్డి, రాంరెడ్డి వెంకటరెడ్డి, సబితారెడ్డి, సాకే శైలజానాథ్, శత్రుశర్ల విజయరామరాజు, శ్రీధర్ బాబు, సుదర్శన్ రెడ్డి, సునీతా లక్ష్మారెడ్డి, సయ్యద్ మహ్మద్ అహ్మదుల్లా, టిజి వెంకటేష్, తోట నరసింహం, వట్టి వసంత్ కుమార్, పి. విశ్వరూప్, వైఎస్ వివేకానందరెడ్డిలు ప్రమాణ స్వీకారం చేశారు. మంత్రివర్గ ప్రమాణ స్వీకారానికి ముందు, అనంతరం జాతీయగీతాన్ని ఆలపించారు.

మంత్రవర్గంలో ఓసీలు 22(ఇందులో ముఖ్యమంత్రి ఒకరు), బీసీలు 10, ఎస్సీలు 6, ఎస్టీలు 1, అల్పసంఖ్యాకవర్గాలు(మైనార్టీ) 1లు ఉన్నారు. మంత్రి దామోదర రాజనర్సింహా, పార్థసారథి, శంకరరావు ఆంగ్లంలో ప్రమాణం చేశారు. ఏరాసు ప్రతాపరెడ్డి, సుదర్శన్ రెడ్డిలు తాము ప్రమాణం చేసేటప్పుడు మంత్రిగా అనే బదులు ముఖ్యమంత్రిగా అంటూ కాస్త తడబడ్డారు. రఘువీరారెడ్డి తల్లిదండ్రుల సాక్షిగా ప్రమాణ స్వీకారం చేశారు.మంత్రుల ప్రమాణ స్వీకారానికి మాజీ ముఖ్యమంత్రి కొణిజేటి రోశయ్య, ప్రదేశ్ కాంగ్రెస్ అధ్యక్షుడు డి. శ్రీనివాస్, కేవిపి రామచంద్రారావు, తెలుగుదేశం, ప్రజారాజ్యం, సిపిఎం, సిపిఐ, లోకకత్తా పార్టీ నేతలు హాజరయ్యారు. కాగా మంత్రి డికె అరుణ కూతురు పెళ్లి ఆనం రామనారాయణరెడ్డి బంధువుల పెళ్లి ఉంది. దీంతో డికె అరుణ ప్రమాణం చేసి పెళ్లికి వెళ్లిపోయారు.