ప్రాధాన్యం లేని శాఖ ఇచ్చినా వన్నె తెస్తా: శంకరరావు

హైదరాబాద్: తనకు ప్రాధాన్యం లేని శాఖా కేటాయించడానికి నిరసనగా అంతకంటే ఎక్కువ పని చేసి చూపిస్తానని చేనేత, జౌళి శాఖమంత్రి శంకరరావు ప్రకటించారు. తనకు చేనేత శాఖ కేటాయించడంపట్ల ఆయన అసంతృప్తిగా ఉన్న విషయం తెలిసిందే. అయితే ఆందరిలా ఆయన ముఖ్యమంత్రి కిరణ్ కుమార్ రెడ్డిపై విరుచుకు పడలేదు. నిరసనగా బాగా పని చేసి చూపిస్తానని చెప్పటం విశేషం. ఆ శాఖకే వన్నె తెస్తానని చెప్పారు. అందులో భాగంగానే ఆయన తన పనిలో నిమగ్నపై పోయారు.

ముఖ్యమంత్రితో మంత్రులందరూ అసంతృప్తులను బుజ్జగించే పనిలో పడగా శంకరరావు మాత్రం చేనేత శాఖా అధికారులకు ఆదేశాలు జారీ చేశారు. 48 గంటల్లో రాష్ట్రంలోని చేనేత పరిస్థితులపై నివేదిక సిద్ధంగా ఉండాలని ఆదేశించారు. అంతేకాదు అసంతృప్తులను కూడా ఆయన సమర్థించలేదు. ప్రాధాన్యం లేని శాఖ ఇచ్చారని ఇలా పత్రికలకెక్కడాన్ని ఆయన ఖండించారు. అసంతృప్తులు ఇలా రాద్దాంతానికి దిగడం సరికాదన్నారు.