డిసెంబర్ 21వ తేదీన వైయస్ జగన్ కొత్త రాజకీయ పార్టీ?

హైదరాబాద్‌: కాంగ్రెసు పార్టీకి, లోకసభ సభ్యత్వానికి రాజీనామా చేసిన వైయస్ జగన్ డిసెంబర్ 21వ తేదీన కొత్త రాజకీయ పార్టీని స్థాపించనున్నట్లు తెలుస్తోంది. డిసెంబర్ 21వ తేదీన తన జన్మదినం సందర్భంగా రాజకీయ పార్టీని ఆయన ప్రకటిస్తారని అంటున్నారు. భవిష్యత్తు కార్యాచరణపై, కొత్త పార్టీ రూపురేఖలపై చర్చించేందుకు వైయస్ జగన్ వర్గం గురువారం ఉదయం హైదరాబాదులో సమావేశమైంది. ఈ సమావేశానికి మాజీ మంత్రి పిల్లి సుభాష్ చంద్రబోస్ తో పాటు పలువురు వచ్చారు. చిరంజీవి నేతృత్వంలోని ప్రజారాజ్యం పార్టీకి చెందిన భూమా నాగిరెడ్డి గురువారం వైయస్ జగన్ శిబిరంలో చేరిపోయారు.

గురువారం ఉదయం వైయస్ జగన్ ను సినీ నటి, రాజకీయ నాయకురాలు రోజా, ప్రజారాజ్యం పార్టీ శాసనసభ్యురాలు శోభా నాగిరెడ్డి కలిశారు. వైయస్ జగన్ శిబిరం సమావేశం హైదరాబాదులో ప్రారంభమైంది. కాగా, ముఖ్యమంత్రి కిరణ్ కుమార్ రెడ్డి మంత్రివర్గంలో తలెత్తిన అసంతృప్తిని వాడుకునేందుకు వైయస్ జగన్ ప్రయత్నిస్తున్నట్లు సమాచారం.