జగన్ క్యాంప్ లో కాటసాని రాంభూపాల్ రెడ్డి, హరిరామ జోగయ్య

హైదరాబాద్‌: కాంగ్రెసు శాసనసభ్యుడు కాటసాని రాంభూపాల్ రెడ్డి, మాజీ మంత్రి చేగొండి హరిరామ జోగయ్య వైయస్ జగన్ శిబిరంలో చేరినట్లే ఉన్నారు. వారిద్దరు విడివిడిగా శుక్రవారం వైయస్ జగన్ ను కలిశారు. కర్నూలు జిల్లాకు చెందిన కాంగ్రెసు శాసనసభ్యుడు కాటసాని రాంభూపాల్ రెడ్డి తనకు మంత్రి పదవి రాకపోవడంపై తీవ్ర అసంతృప్తితో ఉన్నారు. తన అసంతృప్తిని ఆయన బహిరంగంగానే వ్యక్తం చేశారు. గురువారం ఆయన ముఖ్యమంత్రి కిరణ్ కుమార్ రెడ్డిని కలిశారు. పెళ్లికి అహ్వానించడానికే తాను కిరణ్ కుమార్ ఇంటికి వచ్చానని ఆయన చెప్పారు. అయితే, తన పట్ల కిరణ్ కుమార్ రెడ్డి అభిప్రాయాన్ని తెలుసుకోవడానికే ఆయన ప్రాధాన్యం ఇచ్చినట్లు చెబుతున్నారు. తన పట్ల కిరణ్ కుమార్ అభిప్రాయాన్ని, కాంగ్రెసు అధిష్టానం మనోగతాన్ని తెలుసుకున్న కాటసాని వైయస్ జగన్ శిబిరానికి మారినట్లు చెబుతున్నారు.

ఇదిలా వుంటే, చేగొండి హరిరామ జోగయ్య కూడా వైయస్ జగన్ శిబిరంలో చేరడానికి తన ఆసక్తిని చూపినట్లు చెబుతున్నారు. ప్రజారాజ్యం పార్టీ నుంచి బయటకు వచ్చిన తర్వాత ఆయన చాలా కాలంగా మౌనంగా ఉంటూ వస్తున్నారు. చిరంజీవి ప్రజారాజ్యం పార్టీ పెట్టడానికి ముందు ఆయన కాంగ్రెసు పార్టీలో ఉన్నారు. కాంగ్రెసు పార్టీపై ఆయన అప్పట్లో తీవ్ర విమర్శలు చేసి, ప్రజారాజ్యం పార్టీ స్థాపనలో కీలక పాత్ర పోషించారు. చిరంజీవి ప్రజారాజ్యం తగిన ఫలితాలు సాధించకపోవడంతో, కాంగ్రెసు అనుకూల వైఖరి తీసుకోవడంతో ఆయన విసుగు చెంది బయటకు వచ్చారు.