డైలమాలో కెటిఆర్, రమేశ్ ఎన్నిక: బుధవారానికి తీర్పు వాయిదా

న్యూఢిల్లీ: కోర్టులో అభ్యర్తి పిటిషన్ పెండింగ్ లో ఉండగా ఎన్నికలు ఎలా నిర్వహిస్తారని దేశ అత్యన్నత న్యాయస్థానం (సుప్రీంకోర్టు) హైకోర్టు తీర్పును తప్పు పట్టింది. అభ్యర్థులు ఎన్నికను సవాల్ చేస్తూ దాఖలైన పిటిషన్లపై విచారణ సాగుతుండగా తెలంగాణలోని వేములవాడ, సిరిసిల్ల నియోజకవర్గాల్లో ఎన్నికలు నిర్వహించవచ్చన్న హైకోర్టు తీర్పును తప్పు పట్టడంతో పాటు, రాష్ట్ర ఎన్నికల సంఘాన్ని సుప్రీంకోర్టు వివరణ కోరింది. అయితే ఇప్పటికే ఎన్నికలు అయిపోయాయంటూ ఎన్నికల సంఘం చెప్పింది. దీంతో సుప్రీంకోర్టు తన తీర్పును బుధవారానికి వాయిదా వేసింది. ఎన్నికల పిటిషన్ పెండింగ్ లో ఉండగా 151ఎ సెక్షన వర్తించదని చెప్పింది.

తెలంగాణ ఉద్యమంలో భాగంగా తెలంగాణ రాష్ట్ర సమితికి చెందిన 10 మంది శాసనసభ్యులతో పాటు, వేములవాడ నియోజకవర్గానికి తెలుగుదేశం పార్టీ తరఫున ప్రాతినిథ్యం వహిస్తున్న చెన్నమనేని రమేష్, నిజామాబాద్ అర్బన్ కు భారతీయ జనతా పార్టీ తరఫున ప్రాతినిథ్యం వహిస్తున్న సభ్యులు మొత్తం పన్నెండు మంది రాజీనామా చేసిన విషయం తెలిసిందే. ఎన్నికల కమిషన్ పన్నెండు నియోజకవర్గాల్లో ఉప ఎన్నికలు నిర్వహించింది. అయితే సిరిసిల్ల, వేములవాడ నియోజకవర్గాల్లోని అభ్యర్థుల ఎన్నికపై కేసు హైకోర్టులో ఉంది. ఆ రెండు స్థానాలను మినహాయిస్తూ మిగతా స్థానాల ఎన్నికకు ఎన్నికల కమీషన్ నోటిఫికేషన్ జారీ చేసింది. దీన్ని సవాల్ చేస్తూ హైకోర్టులో పిటిషన్ దాఖలైంది. ఆ రెండు స్థానాలకు కూడా ఎన్నికలు నిర్వహించాలని హైకోర్టు ఆదేశించింది. దీంతో ఆ రెండు స్థానాలకు కూడా ఉప ఎన్నికలు జరిగాయి. ఆ ఉప ఎన్నికల్లో వేములవాడ నుంచి చెన్నమనేని రమేష్, సిరిసిల్ల నుంచి కెటి రామారావు గెలిచారు. తాజా సుప్రీంకోర్టు వ్యాఖ్యలతో వారి ఎన్నికపై సందేహాలు అలుముకున్నాయి.

కేసు విచారణలో ఉండగా ఎన్నికలు నిర్వహించరాదని సుప్రీంకోర్టు శుక్రవారం తాజాగా చెప్పడంతో ఇప్పుడు వారి ఎన్నిక సందిగ్ధంలో పడింది. ఇప్పటికే ఎన్నికలు అయిపోయినందున మరోసారి ఇలాంటివి జరగకుడని సుప్రీంకోర్టు చెబుతుందా, లేదా మళ్లీ ఎన్నికలు నిర్వహించాలని చెబుతుందా అనే విషయంపై ఉత్కంఠ నెలకొంది.