రాష్ట్రంలో చేతకాని మొద్దు ప్రభుత్వం: చంద్రబాబు నాయుడు

నల్గొండ: రాష్ట్రంలో చేతకాని దద్దమ్మ మొద్దు ప్రభుత్వం ఉందని మాజీ ముఖ్యమంత్రి, తెలుగుదేశం పార్టీ అధ్యక్షుడు చంద్రబాబునాయుడు గురువారం ఘాటుగా విమర్శించారు. చంద్రబాబు పంట నష్టపోయిన రైతు కుటుంబాలను పరామర్షించటంలో భాగంగా నల్గొండలో పర్యటిస్తున్నారు.అధికారాన్ని కాపాడుకునేందుకు రాజకీయాలు చేస్తున్న ప్రభుత్వం పంట నష్టపోయిన రైతులను మాత్రం ఆదుకోవడంలో విఫలమైందన్నారు. కేంద్రంలో, రాష్ట్రంలో రైతు వ్యతిరక ప్రభుత్వాలు ఉన్నాయని చంద్రబాబు అన్నారు. రైతుల సమస్యను ప్రభుత్వం దృష్టికి తీసుకెళ్లేందుకు శనివారం రాష్ట్రవ్యాప్త రహదారుల దిగ్బంధం ఉంటుందని అన్నారు.

వరి, పత్తి పంట నష్టపోయిన రైతులకు న్యాయం జరిగే వరకు శాసనసభలో రాజీలేని పోరాటం చేస్తామన్నారు. రైతులకు తెలుగుదేశం పార్టీ పూర్తిగా అండగా ఉంటుందన్నారు. మిర్యాలగూడ మండలం కిష్టాపురంలో పంట నష్టపోవటంతో చనిపోయిన రైతు మర్రి సైదులు కుటుంబాన్ని పరామర్శించారు. ఆ కుటుంబానికి రూ.20వేల రూపాయల నష్టపరిహారం అందించారు. జిల్లాలోని మరికొన్ని ప్రాంతాల్లో కూడా చంద్రబాబు పర్యటించి రైతులను వారి వారి సమస్యలు అడిగి తెలుసుకున్నారు. కాగా సూక్ష్మ రుణాలు ఎవరూ చెల్లించవద్దని ప్రజలకు చంద్రబాబు సూచించారు. సూక్ష్మ బాధితులకు తెలుగుదేశం పార్టీ అండగా ఉంటుందన్నారు. కాగా నల్గొండ జిల్లా పర్యటన అనంతరం చంద్రబాబు గుంటూరు పర్యటనకు వెళ్లనున్నారు.