వైయస్ జగన్ పార్టీతో కాంగ్రెసుకు నష్టం లేదు: తోట నర్సింహం

రాజమండ్రి: వైయస్ జగన్ కొత్త పార్టీతో కాంగ్రెసు పార్టీకి ఏ విధమైన నష్టం లేదని మంత్రి తోట నర్సింహం అన్నారు. తూర్పు గోదావరి జిల్లా పర్యటనకు వచ్చిన ఆయన గురువారం మీడియా ప్రతినిధులతో మాట్లాడారు. కొత్త పార్టీలు చాలా వచ్చాయి, పోయాయని ఆయన అన్నారు. 2014లో వచ్చే ఎన్నికల్లో విజయం కాంగ్రెసు పార్టీదే అని, తామే అధికారంలోకి వస్తామని ఆయన అన్నారు.

వర్షాల వల్ల ధాన్యం తడిసిపోయి బాధపడుతున్న రైతులను ఆదుకుంటామని ఆయన హామీ ఇచ్చారు. దీనిపై ఇప్పటికే తాము కేంద్ర వ్యవసాయ శాఖ మంత్రి శరద్ పవార్ తో మాట్లాడినట్లు ఆయన తెలిపారు. తడిసిన ధాన్యం కొనుగోలుకు చర్యలు తీసుకుంటామని ఆయన చెప్పారు. భారీ వర్షాల వల్ల కోస్తాంధ్రలో రైతులు పంటలు నష్టపోయిన విషయం తెలిసిందే.