2014 సాధారణ ఎన్నికలలో వైయస్ జగన్ కు ఎదురుదెబ్బే: యనమల

హైదరాబాద్: 2014 సాధారణ ఎన్నికలలో కాంగ్రెసు పార్టీ గానీ, మాజీ పార్లమెంటు సభ్యుడు, దివంగత ముఖ్యమంత్రి వైయస్ రాజశేఖరరెడ్డి తనయుడు వైయస్ జగన్మోహన్ రెడ్డి గానీ అధికారంలోకి రారని తెలుగుదేశం పార్టీ సీనియర్ నాయకుడు యనమల రామకృష్ణుడు గురువారం విలేకరుల సమావేశంలో అన్నారు. ముఖ్యమంత్రి కిరణ్ కుమార్ రెడ్డి 2014లో కాంగ్రెసు మళ్లీ అధికారంలోకి వస్తుందని ఎన్నికలపై కలలు కుంటున్నారన్నారు. ఆ కలలు నెరవేరవన్నారు.

జగన్ పెట్టే పార్టీతో కాంగ్రెసు కే నష్టమని చెప్పారు. 2014 ఎన్నికలలో ప్రజా సమస్యలపై నిరంతరం పోరు చేస్తున్న తెలుగుదేశం పార్టీకే పట్టం గట్టడానికి ప్రజలు సిద్ధమయ్యారన్నారు. కాగా శుక్రవారం రైతు సమస్యలపై తెలుగుదేశం పార్టీ ధర్నా, ర్యాలీ నిర్వహించునుంది. ఆ ర్యాలీలో ఆ పార్టీ అధ్యక్షుడు చంద్రబాబునాయుడు, శాసనసభ్యులు, శాసనమండలి సభ్యులు పాల్గొననున్నారు. గన్ పార్కు వద్ద ధర్నా అనంతరం అసెంబ్లీకి ర్యాలీగా వెళతారు.