టిడిపి తెలంగాణ నేతలతో తెరాస కార్యకర్తలు వాగ్వివాదం, విమర్శలు

హైదరాబాద్: హైదరాబాదులోని గన్ పార్కు వద్ద గల తెలంగాణ అమరవీరుల స్థూపం వద్ద గురువారం తెలంగాణ రాష్ట్ర సమితి (తెరాస) కార్యకర్తలు తెలుగుదేశం తెలంగాణ నాయకులతో వాగ్వివాదానికి దిగారు. డిసెంబర్ 9వ తేదీ తెలంగాణ డిక్లరేషన్ డే సందర్భంగా తెలుగుదేశం తెలంగాణ నాయకులు, తెరాస కార్యకర్తలు ఒకేసారి వచ్చారు. ఈ సమయంలో తెలుగుదేశం అధ్యక్షుడు నారా చంద్రబాబు తెలంగాణ వ్యతిరేక వైఖరిపై తెరాస కార్యకర్తలు తెలుగుదేశం నాయకులతో వాదులాటకు దిగారు. తెలుగుదేశం నాయకులు సమైక్యాంధ్రవాదుల తొత్తులని తెరాస నాయకురాలు తుల ఉమ ఆరోపించారు.

చంద్రబాబు తెలంగాణ వైఖరిని ఆమె నిరసించారు. ఎన్టీఆర్ కు అనుకూలంగా తెలుగుదేశం నాయకులు నినాదాలు చేయడాన్ని ఆమె వ్యతిరేకించారు. ఎన్టీఆర్ జిందాబాద్, చంద్రబాబు జై అంటూ వారు నినాదాలు చేసి తెలంగాణను అవమానించారని ఆమె అన్నారు. తెలుగుదేశం నాయకులకు ప్రజలే బుద్ధి చెప్తారని ఆమె అన్నారు. చంద్రబాబు చేత శ్రీకృష్ణ కమిటీకి తెలంగాణకు అనుకూలంగా నివేదిక ఇప్పించలేని తెలుగుదేశం తెలంగాణ నాయకులు తెలంగాణ సాధిస్తామంటే ఎవరూ నమ్మబోరని ఆమె అన్నారు.