తెరాస ఎమ్మెల్యేల ఆందోళన, అసెంబ్లీ 15 నిమిషాలు వాయిదా

హైదరాబాద్‌: తెలంగాణ ఉద్యమం సందర్భంగా విద్యార్థులపై పెట్టిన కేసులను ఎత్తేయాలనే తమ డిమాండ్ పై తక్షణమే చర్చించాలని తెలంగాణ రాష్ట్ర సమితి (తెరాస) శాసనసభ్యులు పట్టుబడుతూ శాసనసభా కార్యకలాపాలను స్తంభింపజేశారు. దీంతో ఉప సభాపతి నాదెండ్ల మనోహర్ శాసనసభను పదిహేను నిమిషాల పాటు వాయిదా వేశారు. శుక్రవారం ఉదయం పది గంటలకు శాసనసభ సమావేశమైంది. ఎమ్మార్పీయస్ నేత మందకృష్ణ మాదిగ నిరాహార దీక్షపై బిజెపి, తెలంగాణ ఉద్యమం సందర్భంగా విద్యార్థులపై పెట్టిన కేసులపై తెరాస వాయిదా తీర్మానాలను ప్రతిపాదించాయి. ఆ వాయిదా తీర్మానాలను ఉప సభాపతి మనోహర్ తిరస్కరించారు. అయితే, తాము ప్రతిపాదించిన వాయిదా తీర్మానంపై చర్చ జరగాల్సిందేనని తెరాస సభ్యులు పట్టుబట్టారు. తమ తమ సీట్ల వద్ద నిలబడి ఆందోళనకు దిగారు. మనోహర్ ఎంతగా చెప్పినా వారు వినలేదు.

అన్ని సమస్యలపై చర్చించడానికి ప్రభుత్వం సిద్ధంగా ఉందని, విద్యార్థులపై పెట్టిన కేసుల మీద హోం మంత్రి సబితా ఇంద్రారెడ్డి ప్రకటన చేస్తారని శాసనసభా వ్యవహారాల మంత్రి శ్రీధర్ బాబు చెప్పారు. శాసనసభా సంప్రదింపుల కమిటీ (బిఎసి)లో తీసుకున్న నిర్ణయం మేరకు రైతు సమస్యలపై చర్చను ప్రారంభిద్దామని ఆయన సూచించారు. అయినా తెరాస సభ్యులు వినలేదు. ఎజెండా ప్రకారం సభా కార్యక్రమాలు నిర్వహించుకుందామని నాదెండ్ల మనోహర్ విజ్ఞప్తి చేశారు. అయినా తెరాస సభ్యులు తమ పట్టు వీడకపోవడంతో సభను పదిహేను నిమిషాలు పాటు వాయిదా వేశారు.