ప్రజారాజ్యం పార్టీ అధ్యక్షుడు చిరంజీవితో మంత్రి డికె అరుణ భేటీ

హైదరాబాద్‌: ప్రజారాజ్యం పార్టీ అధ్యక్షుడు మెగాస్టార్ చిరంజీవితో సమాచార, పౌర సంబంధాల మంత్రి డికె అరుణ సమావేశమయ్యారు. శాసనసభ ఆవరణలోని ప్రజారాజ్యం పార్టీ కార్యాలయంలో శుక్రవారం ఉదయం ఆమె చిరంజీవిని కలుసుకున్నారు. వర్షాల కారణంగా రైతులు విపరీతంగా నష్టపోవడం వల్ల నంది అవార్డుల ప్రదానోత్సవ కార్యక్రమాన్ని నెల రోజుల పాటు వాయిదా వేయాలని నిర్ణయించుకున్నామని చిరంజీవికి చెప్పి అందుకు సహకరించాలని కోరినట్లు డికె అరుణ భేటీ అనంతరం మీడియా ప్రతినిధులతో చెప్పారు.

కాగా, మాజీ ముఖ్యమంత్రి కె. రోశయ్య ఎమ్మెల్సీ హోదాలో శాసనమండలి సమావేశాలకు హాజరయ్యారు. తెలంగాణ రాష్ట్ర సమితి (తెరాస) సభ్యులు గులాబీ టీషర్టులు ధరించి శాసనసభకు హాజరయ్యారు. విద్యార్థులపై పెట్టిన కేసుల ఎత్తివేతపై తక్షణ చర్చకు అనుమతించాలని పట్టుబడుతూ తెరాస సభ్యులు సభ వాయిదా పడిన తర్వాత కూడా స్పీకర్ పోడియం వద్ద బైఠాయించి నిరసన తెలిపారు.