మందకృష్ణ మాదిగ ఆమరణ నిరాహార దీక్ష విరమణ

హైదరాబాద్: ఎస్సీ రిజర్వేషన్ల వర్గీకరణకు ప్రభుత్వం కట్టుబడి ఉందని ముఖ్యమంత్రి కిరణ్ కుమార్ రెడ్డి ప్రకటన చేయడంతో ఎమ్మార్పీయస్ నేత మందకృష్ణ మాదిగ ఆమరణ నిరాహార దీక్ష విరమించారు. ఎస్సీ వర్గీకరణ డిమాండ్‌తో ఆమరణ దీక్ష చేస్తున్న మంద కృష్ణ మాదిగ ఆరోగ్యం క్షీణించడంతో ప్రభుత్వం దిగి వచ్చింది. ఎస్సీ వర్గీకరణకు రాష్ట్ర ప్రభుత్వం కట్టుబడి ఉందని ముఖ్యమంత్రి ఎన్.కిరణ్‌కుమార్‌రెడ్డి స్పష్టం చేశారు. ఈ మేరకు శుక్రవారం ఆయన ఒక ప్రకటన విడుదల చేశారు. వర్గీకరణపై ఒత్తిడి తేవడానికి అఖిలపక్షాన్ని ఢిల్లీ పంపాలని రాష్ట్ర శాసనసభ ఏకగ్రీవ తీర్మానం చేసిందని, దీనిపై త్వరగా తగిన చర్య చేపట్టాలని కోరుతూ మాజీ ముఖ్యమంత్రులు వైఎస్ రాజశేఖరరెడ్డి, రోశయ్య కూడా గతంలో కేంద్రానికి లేఖలు రాశారని ప్రకటనలో తెలిపారు. జనవరి 31లోగా మరోసారి అఖిలపక్షాన్ని ఢిల్లీ పంపడానికి రాష్ట్ర సర్కారు సిద్ధంగా ఉందని స్పష్టం చేశారు.

అంతకు ముందు అసెంబ్లీ ఆవరణలో జరిగిన విలేకరుల సమావేశంలో మంత్రులు పితాని, దామోదర రాజనర్సింహ, డొక్కా మాణిక్యవరప్రసాద్, ఎమ్మెల్యే రాజయ్య మాట్లాడుతూ, ఎస్సీల వర్గీకరణకు సంబంధించి జనవరి 31లోగా అఖిలపక్షాన్ని ఢిల్లీ తీసుకెళ్లనున్నట్టు ప్రకటించారు. వీలైతే అంతకన్నా ముందుగానే తీసుకెళ్లే ప్రయత్నం చేస్తామని సీఎం చెప్పారన్నారు. ప్రభుత్వ ప్రకటన నేపథ్యంలో దీక్ష విరమించాల్సిందిగా మంద కృష్ణమాదిగకు విజ్ఞప్తి చేశారు. ప్రభుత్వ ప్రకటనతో గాంధీ ఆస్పత్రిలో దీక్ష కొనసాగిస్తున్న కృష్ణమాదిగ దీక్ష విరమించారు. ఆయనకు మంత్రులు పితాని సత్యనారాయణ, శైలజానాథ్ నిమ్మరసం ఇచ్చి దీక్ష విరమింపజేశారు. అనంతరం మంద కృష్ణ మాట్లాడుతూ, కొత్తగా బాధ్యతలు స్వీకరించిన ముఖ్యమంత్రి కిరణ్‌కుమార్‌రెడ్డికి వర్గీకరణ విషయమై కొంత సమయం కేటాయించాల్సి ఉన్నందున దీక్ష విరమిస్తున్నానన్నారు.

మంద కృష్ణ దీక్షలకు మద్దతుగా ఇక్కడి ఎల్బీ నగర్‌లో ఎమ్మార్పీఎస్ కార్యకర్తలు చేపట్టిన దీక్షా శిబిరం వద్ద శుక్రవారం ఉద్రిక్తత చోటు చేసుకుంది. ప్రభుత్వ నిర్లాక్ష్యాన్ని నిరసిస్తూ ఇద్దరు ఎమ్మార్పీఎస్ కార్యకర్తలు కిరోసిన్ పోసుకుని ఆత్మహత్యాయత్నం చేశారు. వీరిని పోలీసులు వారించారు.