29వ తేదీననే శ్రీకృష్ణ కమిటీ నివేదిక: తెలంగాణపై ఎటూ తేల్చదా?

న్యూఢిల్లీ: శ్రీకృష్ణ కమిటీ ఈ నెల 29నే తన నివేదికను కేంద్ర హోం శాఖకు అందించనున్నట్లు తెలిసింది. 31న నివేదిక సమర్పిస్తామని కమిటీ సభ్యులు చెబుతున్నప్పటికీ, అంతకు రెండు రోజుల ముందే ఇచ్చేయాలని వారు నిర్ణయించినట్లు సమాచారం. నివేదికపై ఉత్కంఠ లేకుండా కొత్త సంవత్సరం ప్రారంభం కావాలనే ఉద్దేశంతో ఈ నిర్ణయానికి వచ్చినట్లు తెలిసింది. ఈ నెల 16న రాష్ట్రంలోని రాజకీయ పార్టీల నాయకులను మర్యాదపూర్వకంగా కలిసి కృతజ్ఞతలు తెలిపేందుకు హైదరాబాద్‌కు వెళ్తున్న కమిటీ, ఆ తర్వాత నివేదికకు తుది మెరుగులు దిద్దనున్నట్లు సమాచారం అందింది. కమిటీ సభ్యకార్యదర్శి వీకే దుగ్గల్‌ తొలి నుంచీ చెబుతున్నట్లుగానే ఈ నివేదికలో సూచనలు తప్పితే సిఫార్సులు ఉండవని రాజకీయ వర్గాలు చెబుతున్నాయి. రాష్ట్రాన్ని సమైక్యంగా ఉంచాలా, లేదంటే విభజించాలా అన్నది కమిటీ నేరుగా చెప్పదని అంటున్నాయి. సమైక్యంగా ఉంటే ఎలాంటి పరిస్థితులు ఉత్పన్నమవుతాయి, విభజిస్తే ఎలాంటి పరిణామాలు తలెత్తుతాయో నివేదికలో విశ్లేషించే అవకాశముందని అంటున్నారు.

కమిటీ రెండో విధివిధానంలో "రాష్ట్రం ఏర్పడిన నాటి నుంచి ఇప్పటివరకు చోటుచేసుకున్న వివిధ పరిణామాల ప్రభావం వివిధ ప్రాంతాల అభివృద్ధిపై ఏ మేరకు ఉందో సమీక్షించాలి" అని ఉంది. దీని ప్రకారం-1969 నాటి తెలంగాణ ఉద్యమం నుంచి ఇప్పటివరకు చోటుచేసుకున్న అంశాలను కమిటీ పూర్తిస్థాయిలో సమీక్షించవచ్చని ఎంపీలు విశ్లేషిస్తున్నారు. ఇందులో భాగంగానే-1972 నాటి జై ఆంధ్ర ఉద్యమానికి దారితీసిన పరిస్థితులు, ఆరు సూత్రాల పథకం, 610 జీవో అమలుపై కమిటీ సమగ్ర పరిశీలన చేసి నిజానిజాలను నిగ్గుతేలుస్తుందని చెబుతున్నారు. రాష్ట్రంలో ఇప్పటివరకు జరిగిన అభివృద్ధి స్థాయి ఎంత, అందులో ప్రాంతీయ సమతౌల్యం ఎంత మేర ఉంది, అసమతౌల్య అభివృద్ధికి కారణాలేంటి, అందుకు పరిష్కార మార్గాలేంటి అన్న అంశాలపై కమిటీ తన అభిప్రాయాలు వ్యక్తం చేయొచ్చని ఎంపీలు విశ్లేషిస్తున్నారు.

విధివిధానాల్లో పేర్కొన్న అంశాలతోపాటు ఇతర అంశాలపై సొంతంగా అభిప్రాయాలు వ్యక్తంచేసే స్వేచ్ఛ కమిటీకి కల్పించినందున గ్రేటర్‌ హైదరాబాద్‌, రాయలసీమ, ఉత్తరాంధ్ర, రాయల్‌ తెలంగాణ రాష్ట్ర డిమాండ్ల సాధ్యాసాధ్యాలను నివేదికలో స్పృశించే అవకాశం ఉందని చెబుతున్నారు. విద్య, ఉద్యోగాలు, విద్యుత్తు, సాగునీటి రంగాల్లో తెలంగాణకు పూర్తిగా అన్యాయం జరిగిందన్న తెలంగాణవాదుల విమర్శలన్నింటిపై కమిటీ సవివరంగా అభిప్రాయాలు వ్యక్తంచేస్తుందంటున్నారు. ఈ నాలుగు అంశాలపై ప్రత్యేక సలహాదారులను పెట్టుకొని అధ్యయనం చేయించిన కమిటీ భవిష్యత్తులో ఎవ్వరూ వేలెత్తి చూపని విధంగా వీటిపై పకడ్బందీ సూచనలు చేసే అవకాశం ఉంటుందని తెలుస్తోంది.