రెండో రోజుకు నిరాహార దీక్ష: పట్టు వీడనంటున్న చంద్రబాబు

హైదరాబాద్: రైతు సమస్యలపై తెలుగుదేశం పార్టీ అధ్యక్షుడు నారా చంద్రబాబు నాయుడు చేపట్టిన నిరవధిక నిరాహార దీక్ష శనివారం రెండో రోజుకు చేరింది. రైతులకు న్యాయం జరిగే వరకు దీక్ష విరమించేది లేదని ఆయన అంటున్నారు. రైతు ప్యాకేజీ మార్చేది లేదని ముఖ్యమంత్రి కిరణ్ కుమార్ రెడ్డి అంటున్నారు. చంద్రబాబు దీక్షకు మద్దతుగా 22 మంది నాయకులు దీక్షలో పాల్గొన్నారు. ఆయన దీక్షకు సంఘీభావంగా రాష్ట్రవ్యాప్తంగా ఆందోళనకు దిగేందుకు తెలుగుదేశం శ్రేణులు సిద్ధమవుతున్నాయి. ఎన్టీఆర్ ట్రస్టు వైద్యులు శుక్రవారం రాత్రి చంద్రబాబు ఆరోగ్యాన్ని పరీక్షించారు.

భారీ వర్షాల వల్ల నష్టపోయిన రైతులకు వరికి ఎకరాకు పది వేల రూపాయల చొప్పున, వాణిజ్య పంటలకు 15 వేల రూపాయల చొప్పున ఇవ్వాలని చంద్రబాబు డిమాండ్ చేస్తున్నారు. బీమా ద్వారా ఉపశమనం కల్పించాలని కూడా ఆయన కోరుతున్నారు. తడిసిన ధాన్యం పూర్తిగా కొనుగోలు చేయాలని ఆయన డిమాండ్ చేస్తున్నారు. శుక్రవారం సాయంత్రం చంద్రబాబుకు సంఘీభావంగా ఆయన కుమారుడు లోకేష్ కాసేపు దీక్షలో కూర్చున్నారు.