ఎఐసిసి ప్లీనరీ: సోనియాపై ఒత్తిడికి తెలంగాణ నేతల ఒత్తిడి

న్యూఢిల్లీ: ఎఐసిసి ప్లీనరీ సందర్భంగా తమ పార్టీ అధ్యక్షురాలు సోనియా గాంధీపై తెలంగాణపై ఒత్తిడి తేవడానికి కాంగ్రెసు తెలంగాణ నేతలు సిద్ధమవుతున్నారు. రేపటి నుంచి రెండు రోజుల పాటు జరిగే ఎఐసిసి ప్లీనరీలో తెలంగాణ అంశం ప్రతిబింబించేందుకు వీలైన చర్యలు చేపట్టేందుకు వారు ప్రణాళిక రూపొందించినట్లు తెలుస్తోంది. కేంద్ర మంత్రి ఎస్ జైపాల్ రెడ్డి నివాసంలో కాంగ్రెసు తెలంగాణ నేతలు శనివారం సమావేశమయ్యారు. ప్లీనరీ సమావేశాల సందర్భంగా తెలంగాణ ఆవశ్యకతను సోనియాకు తెలియజేస్తామని కాంగ్రెసు తెలంగాణ శాసనసభ్యుడు ఆర్. దామోదర్ రెడ్డి సమావేశానంతరం మీడియా ప్రతినిధులతో చెప్పారు. జైపాల్ రెడ్డితో పాటు 12 మంది తెలంగాణ పార్లమెంటు సభ్యులు కూడా సోనియాకు పరిస్థితిని వివరిస్తారని, ఈ మేరకు తాము సోనియాకు ఓ వినతిపత్రం సమర్పిస్తామని వారు చెప్పారు.

శ్రీకృష్ణ కమిటీ తెలంగాణకు వ్యతిరేకంగా నివేదిక ఇస్తే తాము కట్టుబడి ఉండాల్సిన అవసరం లేదని పార్లమెంటు సభ్యుడు సర్వే సత్యనారాయణ అన్నారు. శ్రీకృష్ణ కమిటీ తెలంగాణకు అనుకూలంగా నివేదిక ఇస్తుందా, వ్యతిరేకంగా ఇస్తుందా అనే అనుమానాలున్నాయని, హైదరాబాదును కేంద్ర పాలిత ప్రాంతంగా ప్రకటిస్తారా, ప్రత్యేక రాష్ట్రంగా ఉంచాలంటారా అనే సందేహాలు కూడా ఉన్నాయని ఆయన అన్నారు. నివేదిక ఎలా ఉన్నా తెలంగాణ రాష్ట్రం ఏర్పడాలన్నదే తమ అభిమతమని ఆయన అన్నారు. తెలంగాణ ఉద్యమ నేపథ్యంలో డిజిపి అరవింద రావు చేసిన ప్రకటనపై ఆయన తీవ్రంగా మండిపడ్డారు. అధికారులు తమ పరిధిలో ఉండాలని ఆయన సూచించారు. డిజిపి భయాందోళనలకు గురి చేసేలా, తెలంగాణలో ఏమో జరుగుతుందన్నట్లుగా మాట్లాడుతున్నారని, ఇది సరైన పద్ధతి కాదని ఆయన అన్నారు. రాజీనామాల వల్ల తెలంగాణ రాదని తెలంగాణ కాంగ్రెసు నాయకులు అన్నారు.