కాంగ్రెస్ ప్రభుత్వంపై ఖమ్మం ఎంపీ నామా నాగేశ్వరరావు ఫైర్

హైదరాబాద్: కేంద్రానికి రైతుల సమస్యలపై ఎప్పుడూ చిన్న చూపేనని తెలుగుదేశం పార్టీ సీనియర్ నాయకుడు, ఖమ్మం పార్లమెంటు సభ్యుడు నామా నాగేశ్వరరావు ఆదివారం ధ్వజమెత్తారు. ప్లీనరీలో రాష్ట్ర రైతాంగ సమస్యలపై చర్చించకుండానే పూర్తి చేద్దామని భావిస్తున్నారన్నారు. తెదేపా అధ్యక్షుడి నారా చంద్రబాబునాయుడి నిరాహార దీక్ష మూడో రోజుకు చేరినా ప్రభుత్వం స్పందించటం లేదన్నారు. చంద్రబాబు ఆరోగ్యం ఆందోళనకరంగా ఉందన్నారు.

చంద్రబాబుకు ఏమైనా అయితే రాష్ట్ర ప్రభుత్వం, కేంద్ర ప్రభుత్వాలే బాధ్యత వహించాలన్నారు. ప్రభుత్వం ప్రకటించిన సహాయం పట్ల మంత్రులు రైతులు హర్షం వ్యక్తం చేస్తున్నారని అంటున్నారని, అయితే మరి సహాయం ప్రకటించిన తర్వాత కూడా ఆత్మహత్యలు ఎందుకు కొనసాగుతున్నాయని ఆయన ప్రశ్నించారు. రైతుల సమస్యలను ప్రభుత్వం గాలికి వదిలేసిందన్నారు.