వైద్యులు రాకుండా గది తలుపులు వేసుకున్న చంద్రబాబు

హైదరాబాద్‌: నిజాం వైద్య విజ్ఞాన సంస్థ (నిమ్స్)లో నిరవధిక నిరాహార దీక్ష చేస్తున్న తెలుగుదేశం పార్టీ అధ్యక్షుడు నారా చంద్రబాబు నాయుడు ఆరోగ్యం క్షీణిస్తోంది. సెలైన్ ఎక్కించుకోవడానికి ఆయన నిరాకరిస్తున్నారు. వైదులు లోనికి రాకుండా చంద్రబాబు తన గది తలుపులు వేసుకున్నారు. బుధవారం చికిత్స అందించకపోతే ఆయన ఆరోగ్యం ఆందోళనకరంగా మారే ప్రమాదం ఉందని చెబుతున్నారు. చంద్రబాబు ఆరోగ్యాన్ని జాగ్రత్తగా చూడాలని కోర్టు ఇచ్చిన ఆదేశాలతో నిమ్స్ వైద్యులు చికిత్స అందించడానికి ప్రయత్నించారు.

బుధవారం ఉదయం ఏడు గంటల ప్రాంతంలో వైద్యులు కోర్టు ఆదేశాలతో చంద్రబాబు గది వద్దకు వెళ్లారు. అయితే చంద్రబాబు వారిని లోనికి రానీయలేదు. చికిత్స నిరాకరిస్తే చంద్రబాబుకు గుండె సంబంధమైన ఇబ్బందులు ఎదురయ్యే ప్రమాదం ఉందని అనుమానిస్తున్నారు. ఇదే జరిగితే ఆయన కోమాలోకి వెళ్లే ప్రమాదం ఉందని అంటున్నారు. చంద్రబాబు ఆరోగ్యంపై భార్య భువనేశ్వరి, కుమారుడు లోకేష్ తీవ్ర ఆందోళన వ్యక్తం చేస్తున్నారు. దీక్ష విరమించి, ప్రజల్లోకి వెళ్లాలని వారు సూచిస్తున్నట్లు సమాచారం. అయితే అందుకు చంద్రబాబు అంగీకరించడం లేదని తెలుస్తోంది.