వైయస్ జగన్ లక్ష్యదీక్షకు హాజరైన ఎమ్మెల్యేలపై సోనియా సీరియస్

న్యూఢిల్లీ‌: విజయవాడలోని వైయస్ జగన్ లక్ష్యదీక్షకు వెళ్లినవారిపై తమ పార్టీ అధ్యక్షురాలు సోనియా గాంధీ సీరియస్ గా ప్రతిస్పందించినట్లు కాంగ్రెసు పార్లమెంటు సభ్యులు చెప్పారు. సోనియాతో భేటీ అనంతరం వారు మీడియా ప్రతినిధులతో మాట్లాడారు. జగన్ దీక్షకు వెళ్లవద్దని ఆదేశించాలని ఆమె చెప్పినట్లు వారు తెలిపారు. కాగా, జగన్ దీక్షకు వెళ్లిన శాసనసభ్యులపై కాంగ్రెసు పార్లమెంటు సభ్యుడు వి. హనుమంతరావు సీరియస్ గా ప్రతిస్పందించారు.

పార్టీ శాసనసభ్యులు జగన్ దీక్షకు వెళ్లడం క్రమశిక్షణను ఉల్లంఘించడమేనని ఆయన అన్నారు. కాంగ్రెసు పార్టీ గుర్తుతో గెలిచిన శాసనసభ్యులు వైయస్ జగన్ తో ఉంటామని చెప్పడం క్రమశిక్షణా రాహిత్యమని ఆయన బుధవారం మీడియా ప్రతినిధులతో అన్నారు. ఆ శాసనసభ్యులపై అధిష్టానం సీరియస్ గా ఉందని ఆయన చెప్పారు. వారిపై క్రమశిక్షణా చర్యలు తప్పవని, త్వరలోనే వారిపై చర్యలుంటాయని ఆయన అన్నారు.