డి. శ్రీనివాస్ కు క్లాస్ పీకిన కాంగ్రెసు అధ్యక్షురాలు సోనియా గాంధీ?

న్యూఢిల్లీ‌: రైతు సమస్యలపై ఇటు తెలుగుదేశం పార్టీ అధ్యక్షుడు నారా చంద్రబాబు నాయుడు నిరాహారదీక్ష, అటు విజయవాడలో వైయస్ జగన్ లక్ష్యదీక్ష చేస్తున్న పరిస్థితిలో నిమ్మకు నీరెత్తినట్లు వ్యవహరించడం పట్ల కాంగ్రెసు అధ్యక్షురాలు సోనియా గాంధీ పిసిసి అధ్యక్షుడు డి. శ్రీనివాస్ కు క్లాస్ పీకినట్లు ప్రచారం జరుగుతోంది. దానివల్లనే ఆయన బుధవారం మీడియా ముందుకు వచ్చినట్లు భావిస్తున్నారు. దీక్ష విరమించాలని ఆయన చంద్రబాబును కోరారు. వైయస్ జగన్ వర్గం ప్రభుత్వాన్ని పడగొడుతుందనే వార్తలను ఆయన ఖండించారు. పార్టీ శాననసభ్యులు వైయస్ జగన్ వెళ్తుంటే చూస్తూ ఊరుకోవడం పట్ల ముఖ్యంగా సోనియా డి. శ్రీనివాస్ ను మందలించినట్లు తెలుస్తోంది.

జగన్ వైపు శాసనసభ్యులు, నాయకులు వెళ్లకుండా చూసేందుకు తగిన విధంగా వ్యవహరించడం లేదని ఆమె విమర్సించినట్లు చెబుతున్నారు. ముఖ్యమంత్రి కిరణ్ కుమార్ రెడ్డిపై కూడా ఆమె ఆగ్రహం వ్యక్తం చేసినట్లు చెబుతున్నారు. శాసనసభ్యులను కట్టడి చేయడంలో ఎందుకు దృష్టి పెట్టడం లేదని ఆమె అడిగినట్లు తెలుస్తోంది. దీంతో ఆయన రంగంలోకి దిగి శాసనసభ్యులకు స్వయంగా ఫోన్ చేసి నియంత్రించడానికి ప్రయత్నించినట్లు చెబుతున్నారు.