వైయస్ జగన్ ఎఫెక్టుతో ఢిల్లీలో ప్రకంపనలు మొదలయ్యాయి: రోజా

విజయవాడ: మాజీ పార్లమెంటు సభ్యుడు వైయస్ జగన్మోహన్ రెడ్డి చేస్తున్న లక్ష్యదీక్షకు ఢిల్లీలో అప్పుడే ప్రకంపనలు మొదలయ్యాయని సినీనటి, రాజకీయ నాయకురాలు రోజా బుధవారం విలేకరులతో అన్నారు. అందుకే కేంద్రం అడ్వాన్సు ప్యాకేజీ ఆని చెప్పారు. జగన్ తన డిమాండ్లు పూర్తిగా నెరవేరే వరకు దీక్ష చేస్తారని చెప్పారు. రైతుల అండతోనే కాంగ్రెస్ ప్రభుత్వం అధికారంలోకి వచ్చిందని వారిని నిర్లక్ష్యం చేయటం సబబు కాదన్నారు. రైతులను నిర్లక్ష్యం చేస్తే రైతులే వారని ఇంటికి సాగనంపుతారన్నారు.

శంకర్ రావు అలాంటి వ్యాఖ్యలు చేయటం వల్లే మంత్రి పదవి లభించిందన్నారు. కాంగ్రెస్ ను అతికష్ట సమయంలో ఒంటి చేత్తో పోరాడి దివంగత ముఖ్యమంత్రి వైయస్ రాజశేఖరరెడ్డి అధికారంలోకి తీసుకు వచ్చారన్నారు. వైయస్ రైతులపై ప్రత్యేక దృష్టి పెట్టేవారని ఆయన మార్గంలోనే రైతుల సమస్యల పరిష్కారం కోసం జగన్ చిత్తశుద్దితో దీక్ష చేస్తున్నారన్నారు. విలువలతో కూడిన రాజకీయం, మానవత్వంతో ఆయన పోరాటం సాగుతుందన్నారు. రైతులను నిర్లక్ష్యం చేసే ప్రభుత్వం నామరూపాల్లేకుండా రాష్ట్రంలో కొట్టుకుపోతుందన్నారు. ప్రభుత్వాన్ని దింపే అవసరం జగన్ కు లేదని, ఆ పని రైతులే చేస్తున్నారన్నారు. తెలుగుదేశం పార్టీ అవిశ్వాస తీర్మానం పెట్టినప్పుడు మాట్లాడుదామని చెప్పారు.