అక్రమార్జన కాపాడుకోవడానికే వైయస్ జగన్ లక్ష్యదీక్ష: దేవినేని

విజయవాడ: దివంగత ముఖ్యమంత్రి రాజశేఖరరెడ్డి హయాంలో అక్రమంగా సంపాదించిన కోట్లాది రూపాయలను కాపాడుకోవడానికే మాజీ పార్లమెంటు సభ్యుడు వైయస్ జగన్మోహన్ రెడ్డి లక్ష్యదీక్ష చేపట్టారని తెలుగుదేశం పార్టీ సీనియర్ నాయకుడు దేవినేని ఉమామహేశ్వర రావు బుధవారం వ్యాఖ్యానించారు. వైయస్ జగన్ లక్ష్యం ముఖ్యమంత్రి పదవేనన్నారు. వైయస్ మరణించినప్పటినుండి ఆయన ముఖ్యమంత్రి పదవి కోసం ప్రయత్నాలు చేసి భంగపడ్డారన్నారు.

జగన్ రైతుల జపం చేయటం విడ్డూరంగా ఉందన్నారు. రైతుల గురించి ఏమీ తెలియనివాడు, వారి సమస్యలు పట్టని జగన్ అధికారం కోసం రైతుల జపం చేస్తున్నారని ఆరోపించారు. లక్ష్యదీక్షను జగన్ రాజకీయ వేదికగా మార్చారన్నారు. అది రైతుల కోసం ఏర్పరిచిన లక్ష్యదీక్షగా లేదన్నారు. లక్ష్యదీక్ష కూడా అధికారం కాంక్షతోనే చేస్తున్నారన్నారు.