దీక్ష విరమించాలని చంద్రబాబుకు జయలలిత అపీల్

చెన్నై‌: రైతలు కోసం చేపట్టిన నిరవధిక నిరాహార దీక్షను ఉపసంహరించుకోవాలని అన్నాడియంకె నేత జయలలిత తెలుగుదేశం పార్టీ అధ్యక్షుడు నారా చంద్రబాబునాయుడికి విజ్ఞప్తి చేశారు. కఠినమైన రాజకీయాల్లో చంద్రబాబు ప్రాణాలు అత్యంత విలువైనవని ఆమె అన్నారు. మరెన్నో ప్రజా సమస్యలపై చంద్రబాబు పోరాటం చేయాల్సి ఉందని, ఈ స్థితిలో దీక్ష విరమించి మరో రూపంలో పోరాడాలని, ఇది తన వ్యక్తిగత విజ్ఞప్తి అని ఆమె శుక్రవారం ఓ ప్రకటనలో అన్నారు.

ప్రజా ప్రయోజనాలే అంతిమంగా విజయం సాధిస్తాయని ఆమె అన్నారు. చంద్రబాబు దీక్ష ఎనిమిదో రోజుకు చేరుకున్నా ప్రభుత్వం స్పందించకపోవడాన్ని ఆమె తప్పు పట్టారు. బ్రిటిష్ పాలకులకు వ్యతిరేకంగా గాంధేయ పద్ధతులు ఫలితాలు సాధించాయని, తమది గాంధేయ కాంగ్రెసు పార్టీ అని చెప్పుకుంటున్న పార్టీ కేంద్రంలో, రాష్ట్రంలో అధికారంలో ఉన్నా ఫలితం లభించకపోవడం దురదృష్టకరమని ఆమె అన్నారు.