కిరణ్ కుమార్ రెడ్డికి కాంగ్రెసు తెలంగాణ నాయకుల అల్టిమేటం

హైదరాబాద్: విద్యార్థులపై పెట్టిన కేసుల ఎత్తివేతకు కాంగ్రెసు తెలంగాణ ప్రాంత నాయకులు అల్టిమేటం ఇచ్చారు. మంగళవారం సాయంత్రంలోగా కేసులు ఎత్తివేయాలని, లేకుంటే ఎమ్మెల్యేలూ ఎమ్మెల్సీలు కూడా దీక్షకు దిగుతారని కాంగ్రెసు ఎమ్మెల్సీ జగదీశ్వర్ రెడ్డి హెచ్చరించారు. విద్యార్థులపై పెట్టిన అన్ని కేసులు ఎత్తివేసే వరకు దీక్ష విరమించేది లేదని కాంగ్రెసు తెలంగాణ ప్రాంత పార్లమెంటు సభ్యులు చెప్పారు. కాంగ్రెసు తెలంగాణ ఎంపీలు చేపట్టిన నిరవధిక నిరాహార దీక్ష మంగళవారం రెండో రోజుకు చేరుకుంది.

పార్లమెంటు సభ్యుల దీక్ష నేపథ్యంలో కాంగ్రెసు తెలంగాణ నేతలు మంగళవారం ఉదయం 11 గంటలకు సమావేశమవుతున్నారు. దీక్ష చేస్తున్న ఎంపీలను పలువురు ప్రజాసంఘాల నాయకులు పరామర్శిస్తున్నారు. ఎంపీల దీక్షను విరమింపజేయడానికి ప్రభుత్వం చేసిన ప్రయత్నాలు ఫలించలేదు. మంగళవారం మధ్యాహ్నం తెలంగాణ రాష్ట్ర సమితి (తెరాస) అధ్యక్షుడు కె. చంద్రశేఖర రావు కాంగ్రెసు పార్లమెంటు సభ్యులను పరామర్శించే అవకాశం ఉంది.