కేశవరావుకు శ్రీనివాస్, ముఖ్యమంత్రి కిరణ్ కుమార్ రెడ్డి ఫోన్లు

హైదరాబాద్: విద్యార్థులపై పెట్టిన కేసులను వెంటనే ఎత్తివేయాలని డిమాండ్ చేస్తున్న కాంగ్రెసు పార్లమెంటు సభ్యులకు ముఖ్యమంత్రి కిరణ్ కుమార్ రెడ్డి, ప్రదేశ్ కాంగ్రెసు కమిటీ అధ్యక్షుడు డి శ్రీనివాస్ ఫోన్ చేశారు. దీక్షలో ఉన్న కె కేశవరావుకు పోన్ చేసి దీక్షను విరమించాలని ముఖ్యమంత్రి సూచించారు. మీ డిమాండ్లను పరిశీలిస్తామని చెప్పినట్టు తెలుస్తోంది. డిఎస్ కూడా దీక్షను విరమించమని వారికి సూచించినట్టు తెలుస్తోంది. కాగా దీక్ష చేస్తున్న పార్లమెంటు సభ్యులతో మంత్రులు మరోసారి చర్చించే అవకాశముంది. సోమవారం దీక్ష వద్దకు ప్రభుత్వం తరఫున వచ్చిన మంత్రులు జానారెడ్డి, శ్రీధర్ రెడ్డి తదితరులు మళ్లీ రానున్నట్టు తెలుస్తోంది.

డిఎస్ కూడా కేసుల విషయమై, పార్లమెంటు దీక్ష విషయమై ముఖ్యమంత్రి కిరణ్ కుమార్ రెడ్డితో గాంధీభవన్లో సమావేశం కానున్నట్టు తెలుస్తోంది. ఎంపీల దీక్షను విరమింపజేయడానికి డిఎస్ ముమ్మర ప్రయత్నాలు చేస్తున్నారు. ముఖ్యమంత్రి కిరణ్ కుమార్ రెడ్డి విద్యార్థులపై కేసులన్నీ ఎత్తివేయడానికి సుముఖత వ్యక్తం చేశారని డిఎస్ తెలిపారు. అయోమయం సృష్టించే వారి వలలో పడకుండా పార్టీని కాపాడుకునే బాధ్యత కార్యకర్తలందరిపైనా ఉందన్నారు. ప్రజల ఆకాంక్షలు నెరవేరుస్తూ సోనియా నాయకత్వంలో పని చేయాలని సూచించాలన్నారు.