పార్లమెంటు సభ్యుల దీక్ష మ్యాచ్ ఫిక్సింగ్ కాదు: దామోదర్ రెడ్డి

హైదరాబాద్: విద్యార్థులపై కేసుల ఎత్తివేత కోసం తమ పార్టీ తెలంగాణ పార్లమెంటు సభ్యులు చేపట్టిన నిరవధిక నిరాహార దీక్ష మ్యాచ్ ఫిక్సింగ్ కాదని కాంగ్రెసు తెలంగాణ ప్రాంత శాసనసభ్యుడు ఆర్. దామోదర్ రెడ్డి అన్నారు. మ్యాచ్ ఫిక్సింగ్ జరిగిందన్న ప్రతిపక్షాల విమర్శలను ఆయన కొట్టిపారేశారు. కాంగ్రెసు తెలంగాణ ప్రాంత పార్లమెంటు సభ్యులు, శానససభ్యులు, నేతలు బుధవారం ఉదయం ముఖ్యమంత్రి కిరణ్ కుమార్ రెడ్డిని కలిశారు. ఈ భేటీ అనంతరం దామోదర్ రెడ్డి మీడియా ప్రతినిధులతో మాట్లాడారు. తమకు విద్యార్థుల భవిష్యత్తు ముఖ్యమని, తమ బాధ్యతగా నిరాహార దీక్ష చేపట్టామని ఆయన అన్నారు.

దీక్షలో పాల్గొన్న పార్లమెంటు సభ్యులను పరామర్శించడానికి వందలాది మంది ప్రజా సంఘాల నాయకులు వచ్చారని, కెసిఆర్, గద్దర్ వచ్చారని, ఇదంతా మ్యాచ్ ఫిక్సింగ్ ఎలా అవుతుందని ఆయన అన్నారు. విద్యార్థులపై కేసులు ఎత్తేసినందుకు తాము ముఖ్యమంత్రికి కృతజ్ఞతలు తెలిపామని ఆయన అన్నారు. తామంతా సంఘటితంగా ఉన్నామని, తమలో విభేదాలు లేవని, కలిసే ఉన్నామని, కలిసే ముందుకు సాగుతామని ఆయన అన్నారు.