తెలంగాణపై నోరు మెదపొద్దు: టిడిపి అధ్యక్షుడు చంద్రబాబు కట్టడి

హైదరాబాద్: శ్రీకృష్ణ కమిటీ నివేదిక వెల్లడయ్యే వరకు తెలంగాణపై మాట్లాడవద్దని తెలుగుదేశం పార్టీ అధ్యక్షుడు నారా చంద్రబాబు నాయుడు పార్టీ తెలంగాణ ప్రాంత నాయకులను ఆదేశించారు. శ్రీకృష్ణ కమిటీ నివేదికపై, కృష్ణా ట్రిబ్యునల్ తీర్పుపై ఆయన శుక్రవారం పార్టీ సీనియర్ నేతలతో చర్చించారు. శ్రీకృష్ణ కమిటీ నివేదిక సమర్పణ నేపథ్యంలో జనవరి 6వ తేదీన రాజకీయ పార్టీల నేతలకు ఆహ్వానం పంపిన విషయంపై కూడా సమావేశంలో చర్చించారు. చంద్రబాబు తెలంగాణ నాయకులకు క్లాస్ తీసుకున్నట్లు తెలుస్తోంది.

చంద్రబాబు కట్టడి చేయడంతో సమావేశం ముగిసిన తర్వాత తెలంగాణ ప్రాంత నాయకులు మీడియాతో మాట్లాడకుండానే వెళ్లిపోయారు. ఆ తర్వాత పార్టీ తెలంగాణ ప్రాంత శాననసభ్యులు, ఎమ్మెల్సీలు శాసనసభ ఆవరణలోని శాసనసభా పక్ష కార్యాలయంలో సమావేశమయ్యారు. కృష్ణా ట్రిబ్యునల్ తీర్పు రాష్ట్ర ప్రయోజనాలకు విఘాతం కలిగిస్తోందని, దీనిపై అఖిల పక్షాన్ని ఢిల్లీకి తీసుకుని వెళ్లాలని ముఖ్యమంత్రి కిరణ్ కుమార్ రెడ్డిని డిమాండ్ చేయాలని చంద్రబాబు పార్టీ నాయకులతో అన్నారు.