6న అఖిల పక్ష సమావేశం జరుగుతుందన్న కేంద్ర హోం శాఖ

న్యూఢిల్లీ: శ్రీకృష్ణ కమిటీ నివేదికపై ఈ నెల 6వ తేదీన తలపెట్టిన అఖిల పక్ష సమావేశం సందిగ్ధంలో పడిందని వార్తలు వచ్చిన నేపథ్యంలో కేంద్ర హోం శాఖ సోమవారం ఓ ప్రకటన చేసింది. ఎవరు వచ్చినా, ఎవరు రాకున్నా ఈ నెల 6వ తేదీన అఖిల పక్ష సమావేశం జరుగుతుందని హోం శాఖ వర్గాలు స్పష్టం చేశాయి. ఈ సమావేశంలో పార్టీలకు నివేదిక ప్రతులను అందజేస్తామని స్పష్టం చేసింది. సమావేశానికి రాని పార్టీలకు స్పీడ్ పోస్టులో నివేదికలు పంపుతామని చెప్పింది.

ఈ నెల 6వ తేదీన జరిగే సమావేశంలో శ్రీకృష్ణ కమిటీ నివేదికపై చర్చ జరగదని తెలిపింది. నివేదికను గౌరవప్రదంగా పార్టీలకు అందజేయడానికే సమావేశం ఏర్పాటు చేశామని, నివేదిక అంశాలపై చర్చకు మరో సమావేశం ఏర్పాటు చేస్తామని తెలిపింది. ఇది నిరంతర ప్రక్రియ అని, సమావేశాలు తరుచుగా జరుగుతాయని చెప్పింది.