రూ. 300 కోట్లే మద్దెలచెర్వు సూరి హత్యకు కారణమా?

హైదరాబాద్: ఆర్థిక లావాదేవీల కారణంగానే భాను కిరణ్ మద్దెలచెర్వు సూరిని హత్య చేసినట్లు ప్రచారం జరుగుతోంది. సూరికి చెందిన రూ. 300 కోట్ల ఆస్తులు భాను పేరు మీద ఉన్నాయని, వాటిని తన పేరు మీద రాయించుకోవడానికి సూరి ప్రయత్నాలు మొదలు పెట్టారని, ఈ క్రమంలోనే భానుకు, సూరికి మధ్య వివాదాలు చెలరేగాయని అంటున్నారు. బెయిల్ పై వచ్చిన తర్వాత సూరి తన ఆస్తులపై దృష్టి పెట్టారని, అంత వరకు సూరి ఆస్తులపై ఇష్టారాజ్యంగా భాను అనుభవిస్తూ వచ్చారని అంటున్నారు. గత ఐదు రోజులుగా ఈ వ్యవహారంపై ఇరువురి మధ్య గొడవ జరుగుతోందని అంటున్నారు. సూరి తమను ఇష్టం వచ్చినట్లు బూతులు తిట్టేవాడని, తమను కొట్టేవాడని, దీంతోనే విసిగిపోయి భాను సూరిని హత్య చేశాడని పోలీసుల అదుపులో ఉన్న సూరి మరో అనుచరుడు మధుమోహన్ విచారణలో తెలిపినట్లు సమాచారం.

కాగా, సూరి ఇటీవల విశాఖపట్నంలో 70 కోట్ల విలువ చేసే భూవివాదం సెటిల్‌మెంట్ చేసినట్లు సమాచారం. ఈ సమయంలో మూడు రోజుల పాటు సూరి తన బంధువుల ఇంట్లో ఉన్నట్లు చెబుతున్నారు. సూరి ఇంటర్మీడియట్ చదివింది కూడా విశాఖపట్నంలోనే. కాగా, ఇటీవల విజయవాడలో ఓ పారిశ్రామికవేత్త ఆస్తి తగాదాలో కూడా భాను కిరణ్ చేయి చేసుకున్నట్లు వార్తలు వచ్చాయి. ఇది తీవ్ర వివాదంగా మారింది. సూరి తనను ఎలాగూ చంపుతాడనే భయంతో భానే అతన్ని చంపినట్లు ప్రచారం జరుగుతోంది. అయితే, సూరి హత్యకు ఇది మాత్రమే కారణం కాదని, సూరి హత్య వెనక పెద్ద కుట్ర జరిగిందని, ఓ మంత్రి కుమారుడి పాత్ర కూడా ఇందులో ఉందని సూరి బంధువులు అంటున్నారు.