తెలుగుదేశం అధ్యక్షుడు చంద్రబాబుకు మరో షాక్

హైదరాబాద్: తెలుగుదేశం పార్టీ అధ్యక్షుడు, మాజీ ముఖ్యమంత్రి నారా చంద్రబాబునాయుడికి మరో షాక్ తగిలింది. తెలంగాణ, సమైక్యాంధ్ర విషయంలో చంద్రబాబు రెండు కళ్ల సిద్దాంతానికి విసుగు చెందిన నిజామాబాద్ జిల్లా బాన్సువాడ శాసనసభ్యుడు పోచారం శ్రీనివాస్‌ రెడ్డి తెలుగుదేశానికి రాజీనామా చేస్తున్నట్టు ప్రకటించిన మరుసటి రోజే మరో సీనియర్ నాయకుడు ఆ పార్టీనుండి బయటకు వెళ్లేందుకు సిద్దపడ్డాడు.

తెలుగుదేశం ప్రముఖ నేత నారగోని తాను తెలుగుదేశం పార్టీకి రాజీనామా చేస్తున్నట్టు ప్రకటించినట్టుగా తెలుస్తోంది. తన రాజీనామా ఫాక్సులో చంద్రబాబుకు పంపించినట్టు తెలుస్తోంది. నారగోని గతంలో చిరంజీవి స్థాపించిన ప్రజారాజ్యం పార్టీలో చేరారు. ఎన్నికలకు ముందు సామాజిక తెలంగాణ అనటంతో తెలంగాణకు అనుకూలమనే భావన ఉన్నందున ఆయన పార్టీలో చేరారు. ఆ తర్వాత ప్రజారాజ్యం తెలంగాణకు వ్యతిరేకంగా సమైక్యాంధ్రకు కట్టుబడి ఉన్నామని ప్రకటించడంతో ఆయన ఆ పార్టీకి రాజీనామా చేసి ఓ కొత్త పార్టీ పెట్టారు. ఆ తర్వాత ఆయన తెలుగుదేశంలో చేరారు.