అఖిలపక్షాన్ని బహిష్కరిస్తున్నట్టు చిదంబరానికి కిషన్ ‌రెడ్డి లేఖ

హైదరాబాద్: జనవరి 6వ తేదిన కేంద్రం నిర్వహించే అఖిలపక్ష సమావేశానికి భారతీయ జనతా పార్టీ రావటం లేదని ఆ పార్టీ రాష్ట్ర అధ్యక్షుడు గంగారపు కిషన్‌ రెడ్డి కేంద్ర హోంమంత్రి చిదంబరానికి బుధవారం లేఖ రాశారు. పార్టీకి ఇద్దరిని పిలవటంలే అర్థం లేదని ఆయన ఆ లేఖలో పేర్కొన్నారు. ఒక పార్టీ నుండి ఒక్కరినే పిలవాలని ఆయన కోరారు. పార్టీకి ఇద్దరిని పిలవడం వల్ల ఫలితం ఉండదని ఆయన ఆ లేఖలో అభిప్రాయపడ్డారు. ఒకే పార్టీలోని ఇద్దరు వ్యక్తులు వేరు వేరు అభిప్రాయాలు వ్యక్తం చేసే అవకాశముందన్నారు.

రాష్ట్ర విభజనకు, కేంద్ర ప్రభుత్వం నియమించిన శ్రీకృష్ణ కమిటీకి సంబంధం లేదని ఆయన అన్నారు. కేంద్ర ప్రభుత్వం చిత్తశుద్దితో తెలంగాణ బిల్లు పార్లమెంటులో పెడితే భారతీయ జనతా పార్టీ సంపూర్ణ మద్దతును ఇస్తుందని చెప్పారు. కమిటీలతో సంబంధం లేకుండా తెలంగాణ రాష్ట్రాన్ని ప్రకటించాలని ఆయన లేఖలో కోరారు.