కేంద్ర ప్రభుత్వంపై చంద్రబాబు ఫైర్: పెట్రో ధరల పెంపుకు వామపక్షాల నిరసన

హైదరాబాద్: పెట్రో ధరల పెంపుపై తెలుగుదేశం పార్టీ అధ్యక్షుడు, మాజీ ముఖ్యమంత్రి చంద్రబాబునాయుడు కేంద్ర ప్రభుత్వంపై తీవ్రంగా విరుచుకు పడ్డారు. పెట్రోల్ ధరలను నియంత్రించడంలో ప్రభుత్వం పూర్తిగా విఫలమైందని ఆదివారం ఆరోపించారు. ఇప్పటికే ఈ ప్రభుత్వ హయాంలో చాలాసార్లు పెట్రోలు ధరలు పెరిగాయని గుర్తు చేశారు. కాంగ్రెస్ ప్రభుత్వ హయాంలో సామాన్య ప్రజలు జీవనం కష్టంగా మారిందని ఆవేదన వ్యక్తం చేశారు. పెంచిన పెట్రోలు ధరలను నియంత్రించేలా ప్రభుత్వం చర్యలు చేపట్టాలని సూచించారు. ఆయిల్ కంపెనీలు తమ నిర్ణయాన్ని వెంటనే ఉపసంహరించుకోవాలని చంద్రబాబు కోరారు.

కాగా పెట్రో ధరల పెంపుకు నిరసనగా వామపక్షాలు తీవ్రంగా స్పందించాయి. పెట్రోలు ధరలు పెంచడాన్ని తీవ్రంగా ఖండిస్తున్నట్టు సిపిఐ, సిపిఎం చెప్పారు. రాజధానిలోని ఆర్టీసీ క్రాస్‌రోడ్స్‌లో వామపక్షాల ఆధ్వర్యంలో ధర్నా, రాస్తారోకో నిర్వహించారు. కేంద్ర ప్రభుత్వానికి వ్యతిరేకంగా నినాదాలు చేశారు. పెంచిన పెట్రోల్ ధరను వెంటనే తగ్గించాలని డిమాండ్ చేశారు. సామాన్యుని బతుకుపై కేంద్రంలో ఉన్న కాంగ్రెస్ ప్రభుత్వం అధిక భారం మోపుతుందని ఆరోపించారు.