ఫిబ్రవరి 13 తర్వాతే వైయస్ జగన్ పార్టీ, వైయస్సార్ పార్టీ వైపే మొగ్గు?

హైదరాబాద్: ఫిబ్రవరి రెండో వారంలో మాజీ పార్లమెంటు సభ్యుడు వైయస్ జగన్ తన ప్రాంతీయ పార్టీని ప్రారంభించే అవకాశాలున్నాయి. ఫిబ్రవరి 13వ తేదీతో పాటు 16, 18 తేదీలను కూడా వైయస్ జగన్ తన పార్టీ ప్రారంభానికి పరిశీలిస్తున్నట్లు సమాచారం. సంక్రాంతి తర్వాత పార్టీని ప్రారంభించాలని అనుకున్నప్పటికీ ఎన్నికల కమిషన్ వద్ద నమోదులో జాప్యం కావడంతో పార్టీని ప్రారంభించడానికి కూడా సమయం తీసుకుంటున్నట్లు సమాచారం.

కాగా, తన పార్టీకి వైయస్సార్ పార్టీ పేరు పెట్టడానికే వైయస్ జగన్ ఎక్కువ మొగ్గు చూపుతున్నట్లు సమాచారం. ఈ పేరుతో ఎన్నికల కమీషన్ వద్ద పార్టీ నమోదుకు పత్రాలు సమర్పించారు. అదే సమయంలో వైయస్ జగన్ చిన్నాన్న వైవి సుబ్బారెడ్డి రాజన్న రాజ్యం పేర మరో పేరును ఎన్నికల కమిషన్ ఆమోదం కోసం పత్రాలు సమర్పించారు. అయితే, వైయస్ జగన్ మాత్రం వైయస్సార్ పార్టీ పేరు పట్లనే ఆసక్తి చూపుతున్నట్లు తెలుస్తోంది.