పెట్రోల్ ధర పెంపుపై చంద్రబాబు ఫైర్, ఆందోళనలకు శ్రీకారం

హైదరాబాద్: పెట్రోల్ ధర పెంపుపై తెలుగుదేశం పార్టీ అధ్యక్షుడు నారా చంద్రబాబునాయుడు కేంద్ర ప్రభుత్వంపై తీవ్రంగా ధ్వజమెత్తారు. యుపిఎ ప్రభుత్వం ఏర్పడిన తర్వాత పెట్రోల్ ధరలు పెరగడం ఇది 19 సార్లు పెంచారని, పెట్రో ధరలు 300 శాతం పెరిగాయని ఆయన సోమవారం మీడియా ప్రతినిధుల సమావేశంలో అన్నారు. పెంచిన పెట్రోల్ ధరను ఉపసంహరించుకోవాలని ఆయన డిమాండ్ చేశారు. పెట్రోల్ ధరల పెంపునకు నిరసనగా ఈ నెల 22వ తేదీన నియోజకవర్గాల స్థాయిలో ధర్నాలు జరుగుతాయని ఆయన చెప్పారు. హైదరాబాదులోని ఇందిరా పార్కు వద్ద జరిగే ధర్నాలో తాను పాల్గొంటానని ఆయన చెప్పారు.

పెట్రో ధరల పెంపు వల్ల రవాణా చార్జీలు పెరుగుతాయని, నిత్యావసర సరుకులు ధరలు మిన్నంటాయని, సామాన్య ప్రజలు కూడా కూరగాయల ధరల పెంపు వల్ల కారంపొడి వేసుకుని అన్నం తినాల్సిన పరిస్థితి వచ్చిందని ఆయన అన్నారు. అంతర్జాతీయ మార్కెట్లో ముడి చమురు ధర పెరగడం వల్ల పెట్రోల్ ధరలు పెరిగాయనేది సాకు మాత్రమేనని ఆయన అన్నారు. ప్రజల నుంచి కేంద్ర, రాష్ట్ర ప్రభుత్వాలు పన్నుల రూపంలో పెద్ద యెత్తున దండుకుంటున్నాయని ఆయన విమర్శించారు. ధరల నియంత్రణపై ప్రభుత్వాలు చేతులెత్తేశాయని ఆయన విమర్శించారు.