విశాఖపట్నంలోని వైయస్ జగన్ దీక్షకు వచ్చిన శాసనసభ్యులు

విశాఖపట్నం‌: పెట్రోల్ ధర పెంపునకు నిరసనగా మాజీ పార్లమెంటు సభ్యుడు వైయస్ జగన్ శనివారం చేపట్టిన దీక్షలో పాల్గొనడానికి పలువురు శాసనసభ్యులు వచ్చారు. జగన్‌ను కలిసి వారు తమ మద్దతు ప్రకటించారు. తాజాగా శ్రీకాకుళం జిల్లా టెక్కలి శాసనసభ్యురాలు కొర్ల భారతి వైయస్ జగన్‌ను కలిసి తన మద్దతు ప్రకటించారు. జగన్ పార్టీ పెడితే కాంగ్రెస్‌కు రాజీనామా చేసేందుకు సిద్ధంగా ఉన్నానని భేటీ అనంతరం భారతి చెప్పారు. విశాఖలో చేపట్టిన నేటి జనదీక్షలో పాల్గొననున్నట్లు తెలిపారు. ప్రజారాజ్యరాజ్యం శ్రీకాకుళం జిల్లా నాయకురాలు వరుదు కళ్యాణి విశాఖపట్నం చేరుకుని జగన్‌కు మద్దతు తెలిపారు.

శాసనసభ్యులు అమర్నాథ్ రెడ్డి, శ్రీనివాసులు, కమలమ్మ, శ్రీకాంత్ రెడ్డి, రామచంద్రారెడ్డి, శేషారెడ్డి, మేకపాటి చంద్రశేఖర రెడ్డి వైయస్ జగన్‌ను పాయకరావు పేట శాసనసభ్యుడు బాబూరావు నివాసంలో కలిసి తమ మద్దతు తెలిపారు. దీక్ష కోసం ఎమ్మెల్సీ పద్మావతి, నాయకులు భూమన కరుణాకర్ రెడ్డి, అంబటి రాంబాబు, గండి బాబ్జీ, రవిబాబు తదితరులు వచ్చారు. రాష్ట్రం నలు మూలల నుంచి దీక్షలో పాల్గొనేందుకు వచ్చారు. కాగా, వైయస్ జగన్ దీక్ష కోసం బాబూరావు నివాసం నుంచి బయలుదేరి సంపత్ వినాయక దేవాలయానికి చేరుకున్నారు. అక్కడ ఆయన పూజలు చేశారు.