భానుతో పాటు గుర్గావ్‌లో ఉన్నా, తర్వాత పారిపోయి వచ్చా: మన్మోహన్

హైదరాబాద్: మద్దెలచెర్వు సూరి హత్యకేసులో ప్రధాన నిందితుడు భానుకిరణ్ గన్‌మెన్ మన్మోహన్ సింగ్ పోలీసులకు ఇచ్చిన వాంగ్మూలాన్ని ఓ టీవి ఛానల్ గురువారం ప్రసారం చేసింది. ఈ నెల 23వ తారీఖున మన్మోహన్‌ను పోలీసులు అదుపులోకి తీసుకున్న విషయం తెలిసిందే. అనంతరం ఆయనను విచారించిన పోలీసులు భానుకిరణ్ గురించి అడిగి తెలుసుకున్నారు. ఎక్కెడెక్కడ బస చేశారు. తాము ఏఏ ప్రాంతాలకు వెళ్లారో చెప్పాడు. అయితే భాను తనను చంపుతానని బెదిరించడంతో భానుని విడిచి వచ్చినట్టు పోలీసుల వాంగ్మూలంలో మన్మోహన్ చెప్పారు.

మద్దెలచెర్వు సూరిని భానుకిరణ్ చంపిన విషయం తనకు తెలియదని మన్మోహన్ తన వాంగ్మూలంలో చెప్పాడు. సాయంత్రం ఆరు గంటలకు తనను కూకట్‌పల్లిలో ఉండమన్నాడని, అనంతరం 6.30 గంటల ప్రాంతంలో భాను మరొకరితో వచ్చాడని చెప్పాడు. తాను భానుకిరణ్, లోకనాథ్‌తో కలిసి షోలాపూర్ వెళ్లినట్లు చెప్పాడు. భానుకిరణ్, తాను కలిసి షోలాపూర్ నుండి పూణె వెళ్లినట్లు చెప్పాడు. పూణే నుండి ముంబయి మీదుగా గ్వాలియర్ వెళ్లామని చెప్పాడు. ఆ తర్వాత 8వ తేదిన ఉండే ప్రాంతాన్ని మార్చాలని భానుకిరణ్ యోచించినట్లు చెప్పాడు. ఇద్దరూ గ్వాలియర్ నుండి ఢిల్లీ మీదుగా గుర్గావ్ చేరుకున్నారు.

గుర్గావ్‌లో ఓ పేయింగ్ గెస్ట్ హవుస్‌లో ఉండేవారు. ప్రతిరోజు గుర్గావ్ నుండి ఢిల్లీ వచ్చి తెలుగు పత్రికలు చదువుతూ, సినిమాలు చూస్తూ ఉండేవారు. అనంతరం తిరిగి గుర్గావ్ వెళ్లేవారు. తాము ఇద్దరం అక్కడ ఉన్నట్టు ఎవరికీ చెప్పవద్దని తనను భానుకిరణ్ హెచ్చరించాడని చెప్పారు. తన గురించి పత్రికలలో వస్తున్న వార్తలను చూసుకుంటూ భాను ఎంజాయ్ చేసేవాడని మన్మోహన్ చెప్పాడు. అయితే తనకు తెలుగు రానందున పత్రికలలో ఏం వస్తుందో తనకు తెలియకుండా ఉండేదన్నారు.

ఒకరోజు తన భార్యకు ఫోన్ చేసి మాట్లాడినట్టు మన్మోహన్ చెప్పారు. ఆ విషయం తెలిసిన భాను తనను చంపుతానని హెచ్చరించాడు. దీంతో తాను భయపడి ఈ నెల 20వ తారీఖున సాయంత్రం 4గంటల ప్రాంతంలో తన భానుకి చెప్పకుండా తన ఊరికి పారిపోయానని చెప్పాడు. ఆ తర్వాత 23వ తారీఖున పోలీసులు తనను అదుపులోకి తీసుకున్నారని చెప్పాడు. ఆ తర్వాత పోలీసులను తాము విడిది చేసిన ప్రాంతానికి తీసుకు వెళ్లానని, అయితే అప్పటికే భాను అక్కడినుండి తప్పించుకున్నాడని చెప్పారు.

కాగా భానుకిరణ్‌తో ఇన్నాళ్లూ మన్మోహన్ ఉన్నందువల్ల కొంచె ధైర్యంగా ఉండేవాడని పోలీసులు భావిస్తున్నారు. ఉత్తరాది వాడైన మన్మోహన్ తనతో ఉండటం వల్ల చాలా సులభంగా తప్పించుకున్నాడని, అయితే మన్మోహన్‌ ఆయనతో విభేదించి పోలీసులకు చిక్కడంతో భానుకు ఇప్పుడు అవకాశముందని పోలీసులు భావిస్తున్నారు. మన్మోహన్ దొరికినందువల్ల భాను త్వరలోనే దొరికే అవకాశముందని భావిస్తున్నారు. ఈ నెల 17, 18 తేదీల్లో భాను అరెస్టు అయినట్లు వార్తలు వచ్చిన విషయం తెలిసిందే. అయితే మన్మోహన్ వాంగ్మూలంతో 20వ తేది వరకు ఢిల్లీ పరిసరాల్లో ఉన్న భాను ఇప్పుడు ఎక్కడున్నాడా అని వెతికే ప్రయత్నాల్లో పడ్డారు. అయితే మధురలో ఉండే అవకాశం ఉందని భావిస్తున్నారు.