రోజా ఐరన్ లెగ్, తెలంగాణకు రాజ్యాంగ రక్షణలు: శంకరరావు

హైదరాబాద్: తనపై విమర్శలు చేసిన మాజీ పార్లమెంటు సభ్యుడు వైయస్ జగన్ వర్గానికి చెందిన సినీ నటి, రాజకీయ నాయకురాలు రోజాపై చేనేత మంత్రి పి. శంకరరావు విరుచుకుపడ్డారు. ఐరన్ లెగ్‌గా పేరున్నవారు తనను విమర్శిస్తున్నారని ఆయన అన్నారు. రోజా ప్రకటన కోర్టు ధిక్కారమవుతుందని ఆయన అన్నారు. జగన్‌పై కేసులు ఉపసంహరించుకోవాలని తనపై ఒత్తిళ్లు వస్తున్నాయని, తాను వెనక్కి తగ్గబోనని ఆయన చెప్పారు.

శుక్రవారం గవర్నర్ నరసింహన్‌ను శంకరరావు కలిశారు. అనంతరం ఆయన మీడియా ప్రతినిధులతో మాట్లాడారు. తాను గవర్నర్‌ను మర్యాదపూర్వకంగానే కలిసినట్లు ఆయన తెలిపారు. ఈ భేటీ తర్వాత ఆయన తెలంగాణపై సంచలన ప్రకటన చేశారు. తెలంగాణకు 15 నెలల పాటు రాజ్యాంగ రక్షణలు ఇచ్చే విధానాన్ని అమలు చేస్తుందని, ఆ తర్వాతే తెలంగాణపై ప్రకటన చేస్తుందని ఆయన చెప్పారు. తెలంగాణ ఖాయంగా వస్తుందని, ఆత్మహత్యలు చేసుకోవద్దని ఆయన అన్నారు.