వైఎస్ మరణంతో రాష్ట్రంలో పాలన గాడి తప్పింది: వెంకయ్యనాయుడు

నెల్లూరు: రాష్ట్రంలో దివంగత ముఖ్యమంత్రి వైఎస్ రాజశేఖరరెడ్డి మరణం తర్వాత పాలన గాడి తప్పిందని భారతీయ జనతా పార్టీ సీనియర్ నేత ముప్పవరపు వెంకయ్యనాయుడు ఆదివారం నెల్లూరులో విమర్శించారు. రాష్ట్రంలో పాలన ఏమాత్రం సజావుగా లేదన్నారు. రాష్ట్రంలో, దేశంలో ప్రభుత్వాలు సరిగా లేవన్నారు. ప్రభుత్వాలను కాపాడుకోవడానికే వారికి సమయం సరిపోతుందన్నారు. అత్యంత సచ్ఛీలుడుగా పేరుగాంచిన ప్రధానమంత్రి మన్మోహన్ సింగ్ హయాంలోనే లక్షలకోట్ల రూపాయల కుంభకోణాలు చోటు చేసుకోవడం శోచనీయమన్నారు.

పార్లమెంటులో తెలంగాణ బిల్లు పెడితే భారతీయ జనతా పార్టీ మద్దతునిస్తుందన్నారు. తెలంగాణపై ఇప్పటికైనా కాంగ్రెస్ ప్రభుత్వం నిర్ణయం తీసుకోవాలన్నారు. ఇంకా దాగుడుమూతలు ఆడకూడదన్నారు. 2జి స్పెక్ట్రంపై తప్పకుండా జెపిసి వేయాల్సిందేనని చెప్పారు. జెపిసి వేసే వరకు బిజెపి పోరాటం చేస్తుందన్నారు. జెపిసి ఏర్పాటు చేసే వరకు పార్లమెంటు సమావేశాలు సజావుగా సాగుతాయన్న నమ్మకం లేదన్నారు.