తమిళనాడు ఎన్నికల్లో డిఎంకె హీరో రాజా, కరుణానిధి బాసట

చెన్నై: తమిళనాడు శాసనసభ ఎన్నికల్లో టెలికం మాజీ మంత్రి ఎ రాజా ఉదంతం ప్రధాన ప్రచారాంశం కానుంది. రాజా అంతులేని అవినీతికి పాల్పడ్డాడని ప్రతిపక్ష అన్నాడియంకె అంటుండగా రాజా ప్రజానాయకుడని డిఎంకె నేత, ముఖ్యమంత్రి కరుణానిధి అంటున్నారు. 2జి స్పెక్ట్రమ్ కుంభకోణంలో కటకటాలు లెక్కిస్తున్న రాజాకు కరుణానిధి పూర్తి మద్దతు ఇస్తున్నారు. రాజాను బలిచక్రవర్తిగా అభివర్ణిస్తున్నారు. ప్రజాదరణ గల దళిత నాయకుడు రాజా తమ పార్టీ ప్రచార కార్యదర్శిగా నియమిస్తామని డిఎంకె నాయకులంటున్నారు.

లక్షలాది మంది ప్రజలకు మొబైల్ ఫోన్లను అందుబాటులోకి తేవడమే రాజా చేసిన తప్పని, రాజా జైలులో ఉన్నాడని, ప్రజల తరఫున రాజాను అభినందిస్తున్నానని కరుణానిధి అన్నారు. రాజాను కాగ్ తప్పు పట్టినప్పటికీ కరుణానిధి మాత్రం చాలా స్పష్టతతో ఉన్నారు. వచ్చే ఎన్నికల్లో రాజాను హీరోగా ముందు పెట్టేందుకు వ్యూహం రచిస్తున్నారు. రాజా మొబైల్ మంత్రం ద్వారా గ్రామీణ ఓటు బ్యాంకు చెక్కు చెదరకుండా చూసుకునేందుకు కరుణానిధి ప్రయత్నిస్తున్నారు. అయితే, పట్టణ ప్రాంతాల్లో మాత్రం కాస్తా నష్టం జరిగే అవకాశాలున్నాయని అంటున్నారు. 2జి స్పెక్ట్రమ్ కుంభకోణం గ్రామీణ ఓటర్లపై ప్రభావం చూపదని డిఎంకె వర్గాలంటున్నాయి.