తెలంగాణ బస్సుయాత్రపై ఉద్రిక్తం: జగ్గారెడ్డి అనుచరుడిపై జెఏసి దాడి

మెదక్/వరంగల్: తెలంగాణ సాధన బస్సు యాత్ర మెదక్ జిల్లాలో ఉద్రిక్తంగా మారింది. సోమవారం ప్రారంభమైన బస్సు యాత్ర మధ్యాహ్నం సంగారెడ్డికి చేరుకుంది. అక్కడ సంగారెడ్డి శాసనసభ్యుడు తూర్పు జయప్రకాశ్ రెడ్డి అనుచరుడుగా భావిస్తున్న ఒక వ్యక్తి తెలంగాణ రాష్ట్ర సమితి ఫ్లెక్సీని చించివేశారు. దీనితో ఆగ్రహం వ్యక్తం చేసిన జెఏసి నాయకులు సదరు వ్యక్తిపై దాడి చేశారు. ఆయనను తీవ్రంగా గాయపర్చారు. అక్కడ తీవ్ర ఉద్రిక్త పరిస్థితులు నెలకొనడంతో పోలీసులు వచ్చి ఇరువర్గాలను సముదాయించారు.

కాగా వరంగల్ జిల్లాలో బుధవారం ముఖ్యమంత్రి కిరణ్‌కుమార్ రెడ్డి రచ్చబండ కార్యక్రమాన్ని జిల్లాలోని ప్రతి ఒక్కరు బహిష్కరించాలని జిల్లా తెలంగాణవాదులు విజ్ఞప్తి చేశారు. ఈ నేపథ్యంలో వారు ఇంటింటికి తిరిగి వినతి పత్రాలు అందించారు. మంత్రి పొన్నాల లక్ష్మయ్య ఇంటికి వినతి పత్రం ఇవ్వడానికి వెళ్లడంతో ఆయన అక్కడ లేరు. అయితే వారు గేటుకు ఆ కరపత్రాన్ని ఉంచి వచ్చారు. 9వ తారీఖున వరంగల్‌లో నిర్వహించనున్న రచ్చబండ కార్యక్రమాన్ని ముఖ్యమంత్రి రద్దు చేసుకోవాలని కోరారు. లేదంటే అందరూ అడ్డుకుంటారని హెచ్చరించారు. తెలంగాణ కాంగ్రెస్ నేతలు తెలంగాణ కోసం రాజీనామా చేయాలని డిమాండ్ చేశారు.