తెలంగాణపై సోనియా గాంధీ చెప్పాలి: నాగం జనార్దన్ రెడ్డి డిమాండ్

హైదరాబాద్: తెలంగాణ రాష్ట్ర ఏర్పాటుపై యూపీఏ చైర్‌పర్సన్ సోనియాగాంధీ తక్షణం స్పందించాలని తెలుగుదేశం తెలంగాణ ఫోరం నేత నాగం జనార్దన్‌రెడ్డి డిమాండ్ చేశారు. సోనియా పుట్టిన రోజు కానుక సంగతి ఏమిటని ఆయన గురువారం మీడియా ప్రతినిధుల సమావేశంలో అడిగారు. తన కొడుకును ప్రధానిని చేసే యావ తప్పితే మరొకటి సోనియాకు లేదని ఆయన వ్యాఖ్యానించారు. డిసెంబర్ 9 ప్రకటనను వెనక్కు తీసుకున్నందుకు 500 మంది ఆత్మ బలిదానం చేశారని ఆయన అన్నారు.

తెలంగాణపై సోనియా స్పందించాలని ఆయన డిమాండ్ చేశారు. చట్టబద్ధత లేని శ్రీకృష్ణ కమిటీని ఏర్పాటు చేయడమే క్రూయల్ జోక్ అని ఆయన అన్నారు. శ్రీకృష్ణ కమిటీ నివేదికలో తెలంగాణ ప్రజల అభిప్రాయం ప్రతిబింబించలేదని ఆయన విమర్శించారు. తెలంగాణలో ఏ ఒక్కరైనా సమైక్యంగా ఉందామని అంటున్నారా, అటువంటప్పుడు సమైక్యాంధ్ర గురించి ఎలా మాట్లాడుతారని ఆయన అన్నారు.

తెలుగు మ్యాట్రిమోనిలో మీకు నచ్చిన జీవిత భాగస్వామి ఎంపికలు - రిజిస్ట్రేషన్ ఉచితం!