ఐదు రాష్ట్రాల శాసనసభలకు ఎన్నికల షెడ్యూల్ విడుదల

By Pratap

Published: Wednesday, March 2, 2011, 7:50 [IST]

న్యూఢిల్లీ: ఐదు రాష్ట్రాల శాసనసభల ఎన్నికల షెడ్యూల్‌ను కేంద్ర ఎన్నికల సంఘం మంగళవారం సాయంత్రం విడుదల చేసింది. పశ్చిమ బెంగాల్, తమిళనాడు, కేరళ, పుదుచ్చేరి, అసోం రాష్ట్రాల శాసనసభలకు ఈ షెడ్యూల్‌ను విడుదల చేసింది. తమిళనాడు, కేరళ, పాండిచ్చేరిల్లో రాష్ట్రాల అసెంబ్లీలకు ఒకే రోజు పోలింగ్ జరుగుతుంది. ఈ మూడు రాష్టాల అసెంబ్లీలకు ఏప్రిల్ 13వ తేదీన పోలింగ్ జరుగుతుంది. పశ్చిమ బెంగాల్ అసెంబ్లీ ఎన్నికలకు ఆరు దశల్లో పోలింగ్ జరుగుతుంది. పశ్చిమ బెంగాల్‌లో పోలింగ్ ఏప్రిల్ 18వ తేదీ ప్రారంభమై మే 10వ తేదీన పూర్తవుతుంది. అసోం శాసనసభ ఎన్నికల పోలింగ్ ఏప్రిల్ 4, 11 తేదీల్లో రెండు దశల్లో పోలింగ్ జరుగుతుంది.

ఐదు రాష్ట్రాల ఎన్నికల ఫలితాలు కూడా మే 13వ తేదీన విడుదలవుతాయి. ఈ ఐదు రాష్ట్రాల్లో కూడా ఈ రోజు నుంచి ఎన్నికల ప్రవర్తనా నియమావళి అమలులోకి వచ్చినట్లు ఎన్నికల సంఘం ప్రకటించింది. తొలి సారి ప్రవాస భారతీయులకు ఎన్నికల్లో ఓటు హక్కు కల్పిస్తున్నారు. కాగా, ఆంధ్రప్రదేశ్‌లోని పులివెందుల శాసనసభా నియోజకవర్గానికి, కడప పార్లమెంటు సీటుకు రెండు, మూడు రోజుల్లో ఎన్నికల షెడ్యూల్‌ను ప్రకటించనున్నట్లు ఎన్నికల కమిషన్ ప్రకటించింది.

Published On March 2, 2011