త్వరలో తెలంగాణ సమస్యకు పరిష్కారం: వీరప్ప మొయిలీ

న్యూఢిల్లీ: ప్రత్యేక తెలంగాణ ఉద్యమ సమస్యను ఎలా పరిష్కరించాలో మాకు తెలుసునని ఆంధ్ర ప్రదేశ్ రాష్ట్ర వ్యవహారాల ఇంఛార్జ్, కేంద్రమంత్రి వీరప్ప మొయిలీ గురువారం విలేకరుల సమావేశంలో అన్నారు. కేంద్ర ప్రభుత్వం త్వరలో తెలంగాణ సమస్యను పరిష్కరిస్తుందని ఆయన చెప్పారు. ప్రతి సమస్యకు పరిష్కారం ఉంటుందని ఆయన అన్నారు. అలాగే తెలంగాణ సమస్యకు కేంద్రం ఓ పరిష్కారాన్ని త్వరలో సూచిస్తుందని ఆయన అన్నారు. కేంద్రం ఈ తెలంగాణ అంశంపై దృష్టి సారిస్తుందని చెప్పారు.

కాగా తెలంగాణకు చెందిన కాంగ్రెసు పార్టీ పార్లమెంటు సభ్యులు పార్లమెంటులో తెలంగాణ నినాదాలు చేయడాన్ని, సభను అడ్డుకోవడంపై కూడా ఆయన స్పందించారు. గురువారం రాత్రి 9 గంటలకు తెలంగాణ ప్రాంత ఎంపీలతో సమావేశమవుతామని చెప్పారు. వీరితో ఏఐసిసి అధ్యక్షురాలు సోనియాగాంధీ, ప్రధాని మన్మోహన్ సింగ్ మినహా కోర్ కమిటీ అంతా భేటీ అయ్యే అవకాశం ఉంది.

English summary

Central Minister Veerappa Moily said Central Government know how to solve Telangana issue problem. He said Every problem will be solved. He confirmed that High Command will talk with Telangana MPs today.